«Bolashaq» qaýymdastyǵynyń óńirlik fılıaly uıymdastyrǵan sharada týǵan jerine qol sozǵan mesenattardyń úlgili isi kópshilikke keńinen tanystyryldy. Jyl basynan beri toǵyz aı ishinde Aq Jaıyq óńirinde mesenattardyń kúshimen 166 joba júzege asqan eken. Onyń 138-i aýyl okrýgterinde, 20-sy – aýdan, 8-i – Oral qalasynda atqarylǵan. Osydan-aq jomart júrek jandardyń jylýyn eń aldymen alys aýyl, shaǵyn eldimekender kórip jatqandyǵy kórinip tur.
Sharada 11 atalym boıynsha mesenattar marapattaldy. «Júrekten júrekke» syılyǵyna 2014 jyly Bolat О́temuratov qurǵan «Asyl mıras» qory ıe boldy. Bıyl Oral qalasynda osy qordyń aralasýymen aýtızm dertine shaldyqqan balalardy emdeý, áleýmettik turmysqa beıimdeý úshin barlyq zamanaýı jabdyqtarmen qamtylǵan ortalyq ashylǵan edi.
- О́ńir turǵyndary atynan qaıyrymdylyq pen áleýmettik mańyzy bar sharalardy júıeli túrde júzege asyryp, azamattyq belsendi ustanym arqyly qazaqstandyqtardyń boıynda shynaıy patrıottyq sezim qalyptastyrýda bul qordyń eńbegi óte zor. Bolat О́temuratov atyndaǵy qaıyrymdylyq qor elimizde birqatar áleýmettik jobalardy júzege asyrdy. Sonyń ishinde aýtızm dertine shaldyqqan balalarǵa psıhologııalyq jáne medısınalyq járdem kórsetip júr, - dedi óńir basshysy Altaı Kólginov. Qor dırektory Marat Aımaǵambetovke arnaıy syılyqty aqyn Aqushtap Baqtygereeva tabys etti.
Forýmǵa qatysýshylar týǵan ólkesin damytýǵa belsene kirisken jandardyń qatary kóbeıip kele jatqanyn aıtady. Jyl basynan beri Batys Qazaqstan oblysynda mesenattardyń kúshimen 60 áleýmettik nysan paıdalanýǵa berilgen eken. Ásirese sport, densaýlyq, bilim salalaryna kóńil bólinip, eldimekenderde sport kesheni, balalardyń oıyn alańdary ashylyp, mektepterde arnaıy kabınetter men materıaldyq-tehnıkalyq bazalary jańartyldy.
Forýmda óńirdiń, aýyl aımaqtyń damýyna zor úles qosyp júrgen mesenanttarǵa «Jomart júrek» syılyǵy men alǵys hattary tabys etildi. Marapattalǵandardyń qatarynda batysqazaqstandyq belgili kásipkerler Robert Irmenov, Valentına Mıhno, Serik Merǵalıev, Valerıı Júnisov, Valerıı Goloýhov, Jaslan Jaqypov, aǵaıyndy Seralıevter sekildi jomart júrek jandar bar.
Qazbek QUTTYMURATULY,
«Egemen Qazaqstan»
Batys Qazaqstan
