Batyr babaǵa arnalǵan memorıal bıyl dástúrli ári úzilissiz 19 márte uıymdastyrylyp otyr. Astana, Almaty, Shymkent qalalary men 13 oblystan jıylǵan 272 balýan 9 salmaq dárejesinde kil myqtydan kim myqtyny anyqtady. 272 balýannyń 70-ke jýyǵy názik jandylar ekenin de aıta ketken jón. Jarystyń saltanatty ashylýy da el kútkendeı joǵary deńgeıde uıymdastyryldy.
Alys-jaqynnan kelgen mártebeli meımandar, esimderi elge tanys sport ardagerleri Semeı sport akademııasyna jınaldy. Shákárimniń «Bul án burynǵy ánnen ózgerek» degenindeı, bul jarys ta burynǵy jarystan ózgerek bolǵanyn baıqadyq. Semeı qalasy ákiminiń orynbasary Nadejda Sharova quttyqtaý sóz sóıledi. Semeıdegi sambo kúresin órge súırep, tórge shyǵaryp, shákirt baptaǵan, bul jarystyń ótýine úlken kúsh salǵan jandardyń da eńbegi eleýsiz qalmady. «Qazaqstandyq sporttyq jáne jaýyngerlik sambo federasııasy» respýblıkalyq qoǵamdyq birlestiginiń prezıdenti Rápil Joshybaevtyń Alǵys haty Mereıǵaly Kóshkinov, Qaırat Kúnsafın, Zeken Shaımardanov, Qaırat Charmuhametov, Meırambek Chakenov, Raýshan Alpysbaevalarǵa tabystalsa, Mádenıet jáne sport mınıstrliginiń Sport jáne dene shynyqtyrý isteri komıtetiniń Qurmet gramotasymen Serik Toqtarǵazın, Párman Imahanov jáne Shalqar Jolamanov marapattaldy.
Qarýly Kúshterdiń 25 jyldyq merekelik medalin sambo kúresinen oblystyń aǵa jattyqtyrýshysy Birjan Imahanov óńirine taqty. Aıtpaqshy, bul jarystyń úzdiksiz ótip kele jatqanyna Semeıdegi Atymtaı jomart azamattardyń da qosyp otyrǵan úlesi qomaqty. Oblystyq «Sporttyq jáne jaýyngerlik sambo» federasııasy» qoǵamdyq birlestiginiń prezıdenti Qaırat Kúnsafın Marat Qurmanbaı, Borıs Adıanov, Aıdos Serikqalıuly, Pavel Paıazıtov bastaǵan óńirdiń órkendeýine úles qosyp kele jatqan azamattarǵa alǵys aıtty.
Endi balýandardyń baby jaıynda sóz qozǵasaq. Jarystyń bas tóreshisi Bolat Qojahmetovtiń aıtýynsha, bıyl bozkilem sheberleri tyńǵylyqty daıyndyqpen kelipti. «Munda jastardyń ulttyq quramasynda júrgen balýandar kúresýde. Erler arasynda Shyǵys Qazaqstan, Almaty, Qaraǵandy oblystarynyń balýandary jaqsy óner kórsetti. Al áıelder arasynda Túrkistan oblysynyń shoqtyǵy bıik. «Qabanbaı batyr memorıalyn» utqan balýandardy kelesi jyldan bastap Álem Kýbogyna aparý jaǵy federasııada qaralyp jatyr. Ol aldaǵy kúnniń enshisinde. Shyǵys Qazaqstan oblystyq «Sporttyq jáne jaýyngerlik sambo» federasııasy» qoǵamdyq birlestigi bul jarysty utymdy uıymdastyra bildi», - deıdi jarystyń bas tóreshisi Bolat Qojahmetov.
Balýandar boz kilemde jan alysyp, jan berisip jatqanda «Qazaqstandyq sporttyq jáne jaýyngerlik sambo federasııasy» respýblıkalyq qoǵamdyq birlestiginiń bas hatshysy Qaımen Esendııarovpen pikirlesýdiń sáti tústi. Sambo kúresiniń búgini jaıynda az-kem suhbat barysynda Qaımen Esenamanuly federasııa tarapynan atqarylyp jatqan jumystar týrasynda sóz qozǵady. «Sambonyń 80 jyldyq tarıhy bar, 100-den astam elde federasııasy bar halyqaralyq kúres túri. Sporttyń bul túri elimizde ashylǵaly qarqyndy damyp, Álem, Azııa chempıondary shyqty. Tipti, Eýropany baǵyndyrǵan jerlesterimiz de bar.
Federasııaǵa Rápil Seıithanuly Joshybaev prezıdent bolyp saılanǵaly elimizde sambo kúresin damytý baǵytynda birqatar aýqymdy ister bastaý aldy. Indonezııanyń astanasy Djakarta qalasynda sambo kúresi tuńǵysh ret Azııa oıyndaryna kirdi. Bul sambonyń salmaǵynyń artyp kele jatqanyn kórsetedi. Al «Qabanbaı batyr memorıalyn» uıymdastyrý komıteti jınaqy jumys jasady. Eń birinshi kezekte Semeı sport akademııasynyń dırektory Mereıǵaly Kóshkinovke alǵysymyz sheksiz. ShQO «Sporttyq jáne jaýyngerlik sambo» federasııasy» qoǵamdyq birlestiginiń prezıdenti bolyp Qaırat Kúnsafın saılanǵaly júıeli jumystardyń júrip jatqanyn aıtýǵa bolady. Bul jarys arqyly sambo kúresiniń basy-qasynda júrgen semeılik azamattardyń aýyzbirshiligin kórdim», - deıdi Qaımen Esenamanuly.
Sonymen, eki kún boıy jankúıer qıqýyna ulasqan jarysta «kim myqtylar» anyqtaldy. Komandalyq jarysta erler arasynda 1 oryndy Shyǵys Qazaqstan oblysynyń quramasy enshilese, 2 oryndy Almaty oblysy, 3 oryndy Almaty qalasy ózara bólisti. Al áıelder arasynda 1 oryndy Túrkistan oblysy, 2 oryndy Shyǵys Qazaqstan oblysy, 3 oryndy Qyzylorda oblysy enshiledi. Jekeleı salmaqtarda qyzdar arasynda Bıbihan Nabıeva, Azıza Oshanova, Marjan Bızaq, Áıgerim Álmuqasheva, Farıza Qulyntaı, Nılıýfar Ábilova, Aızada Nabıýlla, Janna Kartova, Aqerke Ábdikárimova top jardy. Erler arasynda Aqjol Baltabekov, Erbol Aldýhan, Maratbek Rahmetollın, Ulan Adambaev, Shalqybek Rahmetollaev, Azat Qýanov, Baýyrjan Baıdıldın, Muhıt Qoıshyman, Erahmet Hasenov qarsylas shaq keltirmedi.
Azamat QASYM,
«Egemen Qazaqstan»
SEMEI
