Mundaǵy sý jańa jaryq baǵanalary men túrli-tústi sýburqaqtar saıabaqqa aıryqsha saltanat syılap tur. Buǵan deıin kólik turaǵy bolǵan alańqaıda boı túzegen alańnan sporttyń birneshe túrimen erkin aınalysýǵa múmkindik beretin qural-jabdyqtardy túgel taba alasyz. Strıt-vorkaýt, basketbol jáne fýtbol alańdary, rollerdrom men skeıtodrom qala jastarynyń jıi jınalatyn ornyna aınalǵan. Asfalt tósenishter men jaıaý júrginshiler joly tutastaı jańarǵan. Zaman talabyna saı navıgasııalar ornatylyp, saıabaq ishin kómkergen jasyl jelek sany burynǵydan da arta túsken. Demalys pen mereke kúnderi munda kelýshilerdiń sany 100 myń adamnan asady. Qaladaǵy haıýanattar baǵy men eń úlken akvaparkti de osy saıabaqtyń ortasynan tabasyz.
«Bul jer bizdiń jastyq shaǵymyzdyń kýási. Qos nemeremizdi ertip kúnde osy saıabaqqa kelý joldasym ekeýmizdiń ómir saltymyzǵa engen. Jańadan salynǵan alańdar balalar úshin qandaı tamasha boldy. Munda taza aýamen tynystap, sergip qaıtamyz» deıdi qala turǵyny Raıhan Jýsanbaeva.
Ákimdik mamandarynyń sózinshe, basqarýshy kompanııa tarapynan jańa sýburqaqtardy, balalar men sport alańdaryn salý úshin 1,6 mlrd. teńge jeke qarjy ınvestısııalanǵan. Búginde memlekettik-jeke áriptestik prınsıpi boıynsha sonaý 90-shy jyldary isten shyqqan «Velotrek» qaıta jasalýda. Keler jyldan bastap bul jerden balalardyń jańa qalashyǵyn salý isi josparda bar kórinedi. Ortalyq saıabaqqa aparatyn Gogol kóshesin abattandyrý jumystary da qolǵa alynǵan. Jóndeý barysynda trotýarlar jańaryp, kóshe jıhazdary qoıylmaq. Buryn qalanyń tarıhı ortalyǵyn rekonstrýksııalaý kezinde Qaldaıaqov kóshesinen Jeltoqsan kóshesine deıingi Gogol kóshesiniń bir bóligi jańarǵan edi.
Jalpy megapolıste bıylǵy jyly 524 kóshe jóndeýden ótken. 1400 eski aýla men qalanyń barlyq jer asty joldary qaıta jańardy. 300 km aryq pen 800 km aýmaqqa ınjenerlik jeli tartylǵan. Jyl aıaǵyna deıin barlyq kóshe jaryqtarynyń úshten biri jaryq dıodty jáne energııa jınaqtaýshy shamdarǵa aýystyrylady, al jańa qoǵamdyq kóliktiń úlesi 87%-ke jetedi. Ýaqyt talabyna saı qaıta túrlengen Ortalyq mádenı jáne demalys saıabaǵynyń esigi qala turǵyndary men qonaqtary úshin aıqara ashyq.
Arman OKTIаBR,
«Egemen Qazaqstan»
ALMATY
