Is-sharaǵa Ortalyq saılaý komıssııasy tóraǵasy B.Imashev, Joǵarǵy sot tóraǵasy J.Asanov, Astanadaǵy EQYU Baǵdarlamalar ofısiniń basshysy D.Sabo, Parlament depýtattary, memlekettik organdardyń, Dostastyq elderi Parlamentaralyq assambleıasynyń ókilderi, Túrkııa, Koreıa, Úndistan, Latvııa, Lıtva, TMD elderi jáne basqa da memleketterdiń saılaý komıssııalarynyń jetekshileri, halyqaralyq jáne qazaqstandyq sarapshylar qatysty.
Konferensııada Qazaqstannyń jáne ózge de elderdiń jahandaný jaǵdaıyndaǵy saılaý júıesiniń ózekti máseleleri talqylanyp, zamanaýı saılaý tehnologııalaryn qoldaný tájirıbeleri qarastyryldy, sondaı-aq saılaý úderisi salasyndaǵy halyqaralyq yntymaqtastyqtyń jańa formalary men tetikteri usynyldy.
Gúlshara Ábdiqalyqova konferensııaǵa qatysýshylarǵa Memleket basshysy Nursultan Nazarbaevtyń quttyqtaýyn oqyp berdi. Onda: «Táýelsizdik alǵan sátten bastap elimiz memlekettik jáne saıası qurylymyn jetildire otyryp, júıeli reformalar jolymen kele jatyr. Qazaqstan saılaý quqyǵy men saılaýdy uıymdastyrý isindegi halyqaralyq joǵary standarttardy berik ustana otyryp, osy saladaǵy jahandyq yntymaqtastyqtyń belsendi jaqtaýshysy bolyp sanalady. Búginde saılaý úderisinde memlekettik organdardyń ashyqtyǵy men eseptiligin, kásibı quzireti men qoǵamnyń olarǵa degen senimin arttyrýǵa yqpal etetin jańa tehnologııalardy engizýge aıryqsha mán berilýde», – delingen.
Konferensııa aıasynda «Qazaqstannyń saılaý júıesiniń qalyptasýy men damýynyń tarıhı-qujattamalyq negizderi» atty kórme ótti. Onda el aýmaǵynda XV ǵasyrdan qazirgi ýaqytqa deıingi túrli tarıhı kezeńderdegi saılaý júıeleriniń qalyptasý jáne damý tarıhy kórsetilgen.
