Sapar aıasynda Qazaqstannyń Syrtqy ister mınıstri Qaırat Ábdirahmanov Ońtústik Amerıka qurlyǵynan kelgen áriptesi Aloızıo Nýnes Ferreıramen resmı kezdesý ótkizdi.
Kezdesý barysynda Q.Ábdirahmanov A.Ferreırany ótken jeksenbi kúni Brazılııadaǵy prezıdent saılaýynyń ótýimen quttyqtady.
– Brazılııa bizdiń Ońtústik Amerıka men Latyn Amerıkasyndaǵy jáne halyqaralyq arenadaǵy basty seriktesimiz. Eki el geografııalyq turǵyda alshaq jatqanymen, bizdi dostyq pen yntymaqtastyq, ózara syılastyq, ári qaraıǵy tıimdi qarym-qatynastarǵa múddelilik baılanystyrady, – dedi Q.Ábdirahmanov.
Mınıstrler eki memlekettiń saýda-ekonomıkalyq, ınvestısııalyq baǵyttarda ózara baılanysyn nyǵaıta túsý qajet degen toqtamǵa keldi. О́tken jyly memleketter arasyndaǵy saýda aınalymy 135 mln AQSh dollaryna jetken.
Al Brazılııanyń aýyl sharýashylyǵy salasynda álemdegi kóshbasshylardyń biri bolýy da yntymaqtastyqtyń jańa qyrlaryn ashýǵa septigin tıgizbek.
Oǵan qosa, 2016 jyldan bastap Qazaqstan men Brazılııa arasynda vızasyz rejim engizilgen.
Al bıyl elimiz alǵash ret Brazılııaǵa ýran tasymaldaı bastady. Atap aıtqanda, «Qazatomprom» UAK» AQ Brazılııanyń «INB» kásipornynyń halyqaralyq tenderin jeńip alǵan bolatyn.
– Qazaqstan óz tarapynan Brazılııamen jasyl tehnologııalar, energetıka, áskerı-tehnıkalyq, ǵarysh jáne týrızm salasynda baılanystardy jandandyrýǵa múddeli, – dedi Q.Ábdirahmanov.
Al kópjaqty qarym-qatynastarǵa keler bolsaq, Qazaqstan men Brazılııanyń halyqaralyq beıbitshilik jáne qaýipsizdik máselelerine baılanysty kózqarastary uqsas.
Sonymen qatar Memleket basshysy Nursultan Nazarbaevtyń «Táýelsizdik dáýiri» atty kitaby aldaǵy jyly Brazılııada portýgal tilinde jaryqqa shyǵatyndyǵy aıtyldy. Osy arqyly Qazaqstan Prezıdenti bastamashylyq etken «Rýhanı jańǵyrý» baǵdarlamasy ońtústikamerıkalyq qurlyqta da tájirıbe júzinde iske asyrylmaq.
Kezdesý barysynda ózara qarym-qatynastardyń basym baǵyttary belgilendi.
Serik ÁBDIBEK,
«Egemen Qazaqstan»
