Kezdesýge Qazaqstan Respýblıkasynyń Premer-Mınıstri B. Saǵyntaev, Ázerbaıjan Respýblıkasynyń Premer-Mınıstri N. Mamedov, Belarýs Respýblıkasynyń Premer-Mınıstri S. Rýmas, Qyrǵyz Respýblıkasynyń Premer-Mınıstri M. Abylǵazıev, Tájikstan Respýblıkasynyń Premer-Mınıstri K. Rasýlzoda, О́zbekstan Respýblıkasynyń Premer-Mınıstri A. Arıpov, Reseı Federasııasy Úkimetiniń tóraǵasy D. Medvedev, Armenııa Respýblıkasynyń Birinshi Vıse-Premeri A. Mırzoıan, Túrikmenstannyń Mınıstrler Kabıneti tóraǵasynyń orynbasary G. Mýradov, TMD-nyń Atqarý komıtetiniń tóraǵasy – Atqarýshy hatshy S. Lebedev qatysty.
«Búgin sizder Úkimet basshylary keńesiniń kezekti otyrysyna qatysasyzdar. Onyń kún tártibinde 15 naqty másele bar. Bul is-shara elderimiz arasyndaǵy ózara tıimdi qarym-qatynastardy odan ári damytýǵa zor úles qosady dep senemin», — dedi Nursultan Nazarbaev.
Qazaqstan Prezıdenti TMD elderi arasyndaǵy saýda-ekonomıkalyq baılanystardy damytýdyń mańyzdylyǵyn aıtty.
«Shırek ǵasyrdan astam ýaqyt ishinde TMD irgeli uıymǵa aınaldy. Bul birlestik halyqtarymyz arasyndaǵy tarıhı baılanystardy saqtap qalýǵa múmkindik berip, ár eldiń egemendigin nyǵaıtýǵa septigin tıgizdi. Qazirgi kezde Dostastyq aıasyndaǵy ózara yqpaldastyqtyń mańyzdylyǵy arta tústi. TMD-daǵy saýda-sattyq kólemi ósip keledi. Byltyr taýar aınalymynyń kólemi 25%-ǵa artyp, $164 mlrd jetti. Mundaı úrdis bıyl da jalǵasyn tabýda», — dedi Memleket basshysy.
Qazaqstan Prezıdenti TMD memleketter basshylary keńesiniń bıylǵy otyrysynyń nátıjelerine de toqtaldy.
«Biz uıymymyzdy nyǵaıtý máselelerin qarastyrdyq. Sonyń ishinde jumystyń tıimdiligin arttyrýǵa jáne ony zaman talabyna saı beıimdeýge baǵyttalǵan jańǵyrtý úderisin ilgeriletýge mán berdik. Dostastyq aıasyndaǵy ekonomıkalyq kooperasııany keńeıtý úshin Ekonomıkalyq damý strategııasyn jandandyrý jáne TMD elderi kórsetetin qyzmetterdiń erkin saýdasy týraly kelisimniń qabyldanǵan jobalaryn júzege asyrýdy jedeldetý qajettigi aıtyldy», — dedi Nursultan Nazarbaev.
Sonymen qatar, Memleket basshysy Dýshanbedegi Memleketter basshylary keńesiniń otyrysynda jarııa etilgen jańa usynystar, sonyń ishinde TMD aıasynda saýda kedergilerin joıý, kólik-logıstıka jáne týrızm salalaryndaǵy ózara is-qımyldyń tıimdiligin arttyrý, ǵarysh salasyndaǵy jobalardy júzege asyrý, sıfrlyq ekonomıkany damytý jáne ınnovasııalyq sheshimderdi paıdalaný máselelerin talqylaý nátıjesi jóninde áńgimeledi.
«Tehnoparkter ıntegrasııasy jáne birlesken ınnovasııalyq jobalardyń júzege asyrylýy TMD keńistiginde joǵary tehnologııalyq óndiris qalyptastyrý úshin úlken sınergetıkalyq paıda tabýǵa múmkindik beredi. Batys elderi jasandy ıntellektke jol ashatyn 5G formatyndaǵy ınternetti belsendi túrde qoldanýda. Bizge ony damytý isimen aınalysý kerek. Muny árqaısymyz jeke-jeke iske asyra almaımyz», — dedi Qazaqstan Prezıdenti.
Nursultan Nazarbaev sóziniń sońynda Memleketter basshylarynyń keńesinde aıtylǵan bastamalardy iske asyrý úshin naqty sharalar keshenin ázirleý qajettigin aıtty.
«Barlyq baǵyt boıynsha tıimdi sharalar keshenin ázirleý – mańyzdy mindet. Bul bastamalardyń júzege asyrylýy ekonomıkanyń damýyna septigin tıgizip qana qoımaıdy, sondaı-aq memleketterimiz arasyndaǵy dostyq ári turaqty qarym-qatynastardy nyǵaıtýdyń mańyzdy faktoryna aınalady», — dedi Memleket basshysy.
Sonymen qatar, kezdesý barysynda Qazaqstan Respýblıkasynyń Premer-Mınıstri B. Saǵyntaev pen Reseı Federasııasy Úkimetiniń tóraǵasy D. Medvedev baıandama jasady.
