Ekonomıkalyq áriptestik artady

Forýmda sóz alǵan Baqyt­jan Saǵyntaev Estonııa Res­pýb­lıkasy Qazaqstannyń Soltús­tik Eýropadaǵy mańyzdy saýda-ekonomıkalyq jáne ınves­tı­sııalyq seriktesteriniń biri ekenin jetkizdi. 
− Yntymaqtastyq ornatýǵa áleýetimiz zor ekenine senimdimin. Búgin ekijaqty kezdesýde tran­zıttik kólik, ekologııalyq jáne energııa únemdeý tehnologııalary salasynda, sonymen qatar Es­tonııa «sıfrly» kóshbasshy retinde tanylǵan aqparattyq teh­nologııalar salasynda ynty­maqtastyqty damytý týraly sóz qozǵadyq, – dedi Úkimet basshysy. 
B. Saǵyntaevtyń aıtýynsha, jaqynda jarııalanǵan Dúnıe­jú­zilik bank «Doing Business-2019» reıtınginde Qazaqstan alǵash ret úzdik 30 eldiń qataryna kirdi. 
− Elimiz birden 8 satyǵa kóte­rilip, 28-orynda turmyz. Bul táýel­sizdik jyldaryndaǵy eń úlken jetistigimiz. Al Estonııanyń 16-orynda ekenin bilemiz. Maqsatymyz – kelesi jyly odan da joǵary kóterilý. Qazaqstanǵa «Doing Business»-te basymdyq bergen ındıkatorlardyń biri halyqaralyq saýda bolatyn. Bastapqy halyqaralyq saýdany teńiz portynan qanshalyqty alys ekenine qarap qarastyratyn. Árıne biz teńizge shyǵatyn joly joq elmiz. Biraq qazir esepteý ádisi ózgerdi. Endi taýarlardyń shek­aradan qanshalyqty tez shyǵýyna qaraıdy. Bul jerde kóp jumys atqardyq. Elimizde halyqaralyq saýda baǵytyndaǵy tıisti zańnamalyq qujat qabyldandy. Qytaımen shekarada «Astana-1» qujaty jiberildi. Elektrondy esepshottar qazir elektrondy túrde rásimdeledi. Búginde júktiń 80%-y «jasyl dáliz» boıynsha Qazaqstan men Qytaı shekarasynan ótedi, – dedi Qazaqstan Premer-Mınıstri. 
Al Estonııa Premer-mınıstri eki el arasyndaǵy mańyzdy salalarǵa toqtalyp ótti. 
− Biz Qazaqstan men Estonııa arasyndaǵy yntymaqtastyqty, sonymen qatar sıfrlandyrý, bilim berý, aýyl sharýashylyǵy salasyn talqyladyq. «Bir beldeý, bir jol» jobasy da nazardan tys qalǵan joq. Qazaqstannyń 18 mln halqy, munaı jáne mańyzdy saýda baılanysy bar. Al Estonııada 1,3 mln turǵyn bar. Alyp orman men haıtek baǵytymyz myqty. Degenmen atalǵan aıyrmashylyqtarǵa qaramastan, eki el arasynda IT, transport, logıstıka, aýyl sharýashylyǵy jáne ekologııalyq tehnologııalar men qaldyqtardy basqarýda yntymaqtastyǵymyz bar. Bul tizimdi bolashaqta ulǵaıtamyz degen oıdamyn, – dedi Iý.Ratas.
Qazaqstan men Estonııa ózara taýar aınalymyn arttyrý maqsatynda ekijaqty saýda-ekonomıkalyq yntymaqtastyq jandandyrýǵa nıetti. Sondaı-aq tranzıttik jáne kólik sala­syn­daǵy yntymaqtastyqty, ekolo­gııalyq jáne energııa únemdeý tehnologııalaryn, sý únemdeýdi, IT-tehnologııalardy damytýda yntymaqtastyqty arttyrý kózdelip otyr. Bul salalar bo­ıynsha Estonııa Eýropalyq odaq­ta ózgelerden oq boıy ozyq tur.
Is-shara barysynda «Kazakh­Invest» AQ ókilderi Qazaqstannyń ınvestısııalyq jobalaryn usyn­sa, óz kezeginde «Enterprise Estonia» ınvestısııalyq agenttigi estonııalyq jobalarmen tanys­tyrdy. Sonymen qatar eki el arasyndaǵy bıznes seriktestik máseleleri, ásirese sıfrlandyrý salasy keńinen talqylandy.

Erkejan AITQAZY,
«Egemen Qazaqstan