Aqtóbe qalasynda 9 memlekettik balabaqsha jeke kásipkerlerdiń basqarýyna berildi. Jyl aıaǵyna deıin taǵy da 5 mektepke deıingi balalar mekemeleri jekemenshik ıeleriniń senimgerlikpen basqarýyna aýystyrylmaq. Basty maqsat – jeke ınvestordyń qarajatyn tartý men paıdalaný arqyly eskire bastaǵan balabaqsha ǵımarattaryna kúrdeli jóndeý júrgizý, qaıta jańǵyrtý ári balabaqshalardy búgingi zamanaýı qural-jabdyqtarmen jáne jańa jıhazdarmen jabdyqtaý.
Bul bıýdjet qarajatyn tıimdi jumsaý qajettiliginen týyndaıdy. Ekinshiden, jergilikti bıýdjetterge túsetin salmaq pen júktemeni azaıtý maqsaty kózdelgen. Mundaı áleýmettik jaýapkershiligi joǵary iske bıznes ókilderin tartý – búgingi kúnniń basty talaptarynyń biri. Solaı bola tursa da óńirdegi memlekettik balabaqshalar júıesindegi ózgerister keıbir ata-analardyń alańdaýshylyǵyn týǵyzdy. Balabaqshada qyzmet etip júrgen kásibı biliktiligi joǵary mamandardyń arasynda da qobaljý paıda bolǵany jasyryn emes. О́ıtkeni qyzmetkerlerdi jumys ornynda qaldyrýǵa nemese shyǵarýǵa jańa balabaqshany basqarýǵa alǵandardyń erki bar emes pe? Sonymen birge ata-analar da kásipkerler erik ózderine tıgen soń balabaqshaǵa tólenetin tólemdi ósirip jiberetin shyǵar dep qaýiptenedi. Alaıda ázirge mundaı jaǵdaı oryn alǵan joq.
«Qazaqstandaǵy mektepke deıingi mekemeler qaýymdastyǵy» Aqtóbe oblysy fılıalynyń tóraıymy Natalıa Kaıýdınanyń aıtýynsha, qazirgi kezde balabaqsha tólemaqysynyń kólemi memlekettik jáne jekemenshik balabaqshalarda birdeı kólemde. Sondaı-aq memlekettik tapsyrys aıasynda jumys isteıtin balabaqshalar qyzmeti memleket tarapynan udaıy qadaǵalanady. Buǵan tótenshe jaǵdaılar jáne sanıtarlyq tazalyq boıynsha tekserýler de kiredi eken. Munyń syrtynda arnaıy dıvızııalyq komıssııa men qalalyq bilim bólimi mamandary da qadaǵalaý jumystaryn júrgizedi. Al memlekettik balabaqshada qyzmet etip júrgen mamandardyń óz ornynda qalýy nemese qalmaýy jónindegi másele týraly senimgerlikpen basqarýǵa berilgen «Bul-bul» balabaqshasynyń basqarýshysy Ǵazıza Álimjanqyzy bylaı dedi: «Tájirıbeli, bilikti mamandardy jumystan shyǵarý biz úshin óte tıimsiz. Mundaı kadrlar onsyz da tapshy ekeni belgili. Sondyqtan eshkimdi jumysynan shettetken joqpyz. Ári mundaı oıdan aýlaqpyz».
Oblys ortalyǵyndaǵy «Dımash» balabaqshasyn senimgerlikpen basqarýǵa alǵan kásipker Zlata Sısenǵalıeva da osy oıdy qýattaıdy.
Eń bastysy, búginde óńirde memlekettik balabaqshalardy senimgerlikpen basqarýǵa alǵan kásipkerler men balabaqsha mamandary jáne ata-analar arasynda ózara senim ornyǵyp keledi. Buǵan pedagogtar quramynyń sol kúıinde ózgerissiz qalǵany, jańa basqarýshylar kórsetilgen senimdi aqtap balabaqsha ǵımarattaryn qaıtadan jańǵyrtqany, ár balaǵa tólenetin balabaqsha qunynyń ózgermegeni dálel.
Temir QUSAIYN,
«Egemen Qazaqstan»
AQTО́BE
