Memlekettik qyzmetterdi kórsetýdiń negizgi qaǵıdalarynyń biri qyzmet kórsetý úrdisin únemi jetildirý bolyp tabylady.
Osylaısha, QR Memlekettik qyzmet isteri jáne sybaılas jemqorlyqqa qarsy is-qımyl Agenttigimen kolledjderde jáne joǵary oqý oryndarynda stýdentterge qyzmet kórsetý ortalyqtaryn ashý bastamasy qolǵa alynǵan bolatyn.
Qazirgi tańda, qalamyzdaǵy 3 joǵary oqý oryndarynda Q.Jubanov atyndaǵy Aqtóbe óńirlik memlekettik ýnıversıtetinde, Qazaq-orys halyqaralyq ýnıversıtetinde jáne S. Báıshev atyndaǵy Aqtóbe ýnıversıtetinde stýdentterge qyzmet kórsetý ortalyqtary men «ózine-ózi elektrondyq qyzmet kórsetý buryshtary» jumys jasaýda.
Memlekettik kórsetiletin qyzmet basqarmasynyń basshysy Ilıa Paktiń aıtýynsha, SQKO ashylýy oqý úderisiniń aqparattyq ashyqtyǵy men oqý prosesiniń aıqyndyǵyn damytýǵa, servıstik qyzmetti ońtaılandyrýǵa, ózara syılastyq mádenıeti men sybaılas jemqorlyq kórinisterine tózbeıtin ortany qalyptastyrýǵa múmkindik beredi.
«Osy tusta Q.Jubanov atyndaǵy Aqtóbe óńirlik memlekettik ýnıversıtettiń oń tájirıbesin atap ótýge bolady. 2017 jyldyń 26 qyrkúıeginen bastap ýnıversıtette «Temirqazyq» stýdentterge qyzmet kórsetý ortalyǵy jumys jasaýda.Búgingi kúni ol «bir tereze» qaǵıdaty boıynsha jumys isteıdi jáne stýdentterge qyzmet kórsetý tártibi arnaıy termınal arqyly elektrondy kezek berý talony arqyly júzege asyrylady. Sondaı-aq, ýnıversıtet qyzmetkerleri men stýdentter elektrondy túrde «eARSU» nemese «earsubot telegrams bot» mobıldi qosymshasy arqyly qyzmet alýǵa ótinish bere alady. «Temirqazyq» stýdentterge qyzmet kórsetý ortalyǵynyń ashylýynan bastap 29 303 qyzmet kórsetilgen. Biz bul oń tájirıbeni basqa oqý oryndarynda qoldanýǵa bolady dep esepteımiz», - dedi I.Pak.
Sondaı-aq, M.Ospanov atyndaǵy Batys Qazaqstan memlekettik medısına ýnıversıtetinde stýdentterdi jataqhanaǵa ornalastyrýǵa elektrondyq jańalyǵyn engizý boıynsha Qazaqstandaǵy alǵash ýnıversıtet boldy.
«Sırıýs» júıesi bólmelerdi bólýdiń ashyqtyǵyn qamtamasyz etedi, ótinish berýshimen tikeleı baılanysty joıady, ıaǵnı sybaılas jemqorlyqqa qarsy turýǵa yqpal etedi.
«Baǵdarlamaǵa ótinish tastap, stýdentter ESQ-ny onlaın qoıady jáne tólem tóleıdi. Sodan keıin olar túbirtektiń sýretin túsirip, ony túbirtek bólimine bekitedi. Osydan keıin olar qonystaný týraly sheshim qabyldaıdy jáne jataqhanaǵa ornalasa alady», - dep túsindirdi Ilıa Pak.
Sonymen qatar, uıymdastyrýshylardyń habarlaýynsha, búgin Aqtóbe oblysynyń 37 orta arnaıy bilim berý mekemesinde «elektrondy ózine-ózi qyzmet kórsetý buryshy» ashyldy.
Temir QUSAIYN,
«Egemen Qazaqstan»
Aqtóbe
