Sábıt Muqanov atyndaǵy oblystyq ámbebap kitaphanada ótken «Uly hannyń ordasy – elimiz úshin mańyzdy tarıhı-mádenı oshaq» atty birinshi respýblıkalyq ǵylymı-tájirıbelik konferensııa osynaý mańyzdy oqıǵanyń 10 jyldyǵyna arnaldy. Búginde el jadynda «Abylaıdyń aq úıi» retinde saqtalǵan mańyzdy ǵımarat baǵa jetpes tarıhı eskertkishterdiń biri sanalady. Prezıdenttiń tikeleı qoldaýymen«Mádenı mura» baǵdarlamasyna engizilip,kúrdeli jóndeý júrgizilgeli ony tamashalaıtyn sheteldik týrısterdiń da qatary arta túsken.
Konferensııanyń ashylýynda sóılegen sózinde oblys ákiminiń orynbasary Madııar Qojahmet Elbasynyń «Uly Dalanyń jeti qyry» maqalasy jurtshylyq tarapynan zor qoldaýǵa ıe bolǵanyn, tarıhı sanany jańǵyrtý turǵysyndaǵy ólsheýsiz mánin atap kórsetti. Keshenniń kıeli jerlerdiń respýblıkalyq kartasyna engizilgenin jetkize kelip, Abylaı muralaryn nasıhattaýǵa úlken úles qosyp júrgen »Egemen Qazaqstan» gazetiniń qyzmetkeri, jazýshy-jýrnalıst Jaqsybaı Samratqa aımaq basshysynyń qurmet gramotasyn, M. Qozybaev atyndaǵy SQMÝ-niń professory Zarqyn Taıshybaıǵa alǵys hatyn tabys etti.
Jıynda tarıh ǵylymdarynyń doktory Záýre Qartova, Petropavl qalalyq sotynyń sýdıasy Araı Ábilmájinova, memlekettik muraǵattyń dırektory Sáýle Málikova, QR Qarýly Kúshter áskerı-tarıhı mýzeıiniń ǵylymı qyzmetkeri, Shyńǵys han atyndaǵy dúnıejúzilik akademııanyń qurmetti akademıgi Ǵızzat Tabyldın, Abylaıdyń dańǵyl joldaryn zertteýshi Murat qajy Ydyrysuly, taǵy basqalary oı-pikirlerin ortaǵa salyp, daryndy basshy,qaıratker ári dańqty qolbasshynyń jońǵarlarǵa qarsy shaıqastardaǵy, qazaq halqyn ult retinde uıystyrýdaǵy róli jaıly jan-jaqty sıpattap berdi.
«Nursultan Ábishuly «Abylaı ańsaǵan azattyq» maqalasynda «Abylaı han qyzǵyshtaı qoryp, tumaryndaı táý etken, armandap ketken qazaq eliniń Táýelsizdigine bizder, búgingi býyn qazaqstandyqtardyń jetkeni úshin de sheksiz táýbe aıtyp, bólinýge bastaıtyn jershildik pen rýshyldyq dertinen arylǵanymyz jón. Sebebi, búgingi zamannyń jańasha túrlengen qaýip-qateri keshegiden kem soqpaıdy.Endeshe Abylaıdyń armanyna qazirgi Qazaqstan qol jetkizgenin erekshe maqtan tutyp, sútteı uıyǵan tatýlyǵymyzdy saqtaýǵa qyzmet etý– barshamyzdyń paryzymyz» degen sózderi búgin de mańyzyn joıǵan joq. Biz bıyl «Abylaıdyń qara joly» atty jobany qolǵa alyp, ǵylymı ekkspedısııa Qazaqstannyń barlyq aımaǵyn aralap shyqty. Ondaǵy maqsat–«Rýhanı jańǵyrý» baǵdarlamasy aıasynda kıeli jerlerdi dáripteý, zerdeleý,ǵylymı zertteýler júrgizý, Abaılaıhanmen baılanysty kerýen jolyn boıynsha nysandardy júıeleý,» deıdi ǵylymı ekspedısııanyń jetekshisi M. Ydyrysuly.
Murajaı-kesheninde ornalasqan 4 zalda Abylaı hannyń balalyq shaǵynan han taǵyna otyrǵanǵa deıingi ómirin qamtıtyn jádigerler, eksponattar toptastyrylǵan.
О́mir ESQALI,
«Egemen Qazaqstan»
Soltústik Qazaqstan oblysy
