Bolashaq ana amnıotıkalyq suıyqtyqtyń merziminen ketýine baılanysty ortalyqqa shuǵyl túrde jetkizilgen. Ýltradybystyq zertteý nátıjesinde mamandar ishtegi náresteniń ómirine qaýip tónip turǵanyn anyqtap, shuǵyl ota jasaýǵa sheshim qabyldaıdy.
Kesar tiligi ortalyq dırektory Svetlana Rahımova bastaǵan dárigerler tobynyń qatysýymen júrgizilip, salmaǵy nebári 730 gramm bolatyn qyz bala dúnıege keldi.
Náreste ómiriniń alǵashqy sátinen bastap jańa týǵan balalardyń jansaqtaý jáne qarqyndy terapııa bóliminde boldy. 28 kún boıy dárigerler men medbıkeler onyń jaǵdaıy úshin táýlik boıy kúresti.
Jaǵdaıy turaqtanǵan soń sábı kútimniń ekinshi kezeńine, ıaǵnı jańa týǵan náresteler patologııasy bólimine aýystyryldy. Otbasy ortalyqta 56 kún boldy. Osy ýaqyt ishinde balanyń salmaǵy eki eseden astam artyp, 1 800 gramǵa jetti.
«Biz bul jerge kútpegen jerden tústik, eshkimdi tanymaıtyn edik. Alaıda alǵashqy kúnnen bastap shynaıy qamqorlyqty sezindik. Dárigerler men medbıkeler qyzymyzdyń densaýlyǵy men bolashaǵy úshin bar kúshin saldy. Olardyń kásibıligi men janqııarlyǵy bizdi óte tánti etti», dep balanyń anasy medısına qyzmetkerlerine alǵys bildirdi.
Bul oqıǵa ortalyq mamandarynyń eń názik pasıentterge ómirge alǵashqy qadam jasaýǵa kómektesip júrgen kúndelikti eńbeginiń taǵy bir jarqyn mysaly.
Aıta keteıik, Almaty qalasynyń №2 qalalyq perınataldyq ortalyǵyndaǵy balalar reanımasııasy bólimshesinde salmaǵy óte tómen bolyp týǵan, sondaı-aq táýlik boıy qarqyndy terapııany qajet etetin aýyr háldegi jańa týǵan nárestelerge medısınalyq kómek kórsetiledi.
Ortalyq jumys istegen jyldar ishinde myńdaǵan balany aman alyp qaldy. Bólimshe dárigerleri men medbıkeleri kúndiz-túni jańa týǵan sábılerdiń ómiri úshin kúresip, zamanaýı emdeý, kútim jasaý jáne jaǵdaıyn baqylaý ádisterin qoldanady.
