Foto: astanasottary
Sot materıaldaryna sáıkes, oqıǵa 2 sáýirde saǵat 12:47 shamasynda Ál-Farabı kóshesinde tirkelgen. Júrgizýshi Uly dala kóshesinen F. Ońǵarsynova kóshesine baǵyt alǵan tusta jaıaý júrginshiler ótkeli arqyly ótip bara jatyp, jol qozǵalysy erejelerin óreskel buzǵan.
Sot anyqtaǵandaı, júrgizýshiniń áreketi kópshilikke ashyq túrde demonstratıvti agressıvti sıpat alǵan. Ol jol qozǵalysy erejelerin óreskel buzyp qana qoımaı, jaıaý júrginshiler men ózge de jol qozǵalysyna qatysýshylardyń ómiri men densaýlyǵyna naqty qaýip tóndirgen.
Sot otyrysynda L. óz kinásin tolyq moıyndap, ókinish bildirdi. Ol asyǵys bolǵanyn aıtyp, kólikti joǵary jyldamdyqpen basqarǵanyn bilse de, jol bos dep oılaǵanyn túsindirdi.
Is materıaldarymen quqyq buzýshylyq tolyq dáleldendi. Oǵan L.-nyń túsiniktemesi, ákimshilik quqyq buzýshylyq hattamasy, ınspektor raporty jáne «Sergek» júıesiniń beınejazbasy negiz boldy.
Qoldanystaǵy zańnamaǵa sáıkes, memlekettik tártipti buzǵany úshin 20 AEK aıyppul nemese 20-60 saǵat qoǵamdyq jumys ıakı 5-15 táýlik ákimshilik qamaý qarastyrylǵan.
Sot úkimimen L. buzaqylyq jasaǵany úshin kináli dep tanylyp, oǵan 15 táýlik ákimshilik qamaý jazasy taǵaıyndaldy.
Túrkistanda polıseıler jol erejesin buzǵan 700-den astam júrgizýshini anyqtady
Jaza taǵaıyndaý kezinde sot quqyq buzýshylyqtyń sıpaty men qoǵamdyq qaýiptiligin eskerdi. Atap aıtqanda, júrgizýshiniń qala ortalyǵynda, kúndizgi ýaqytta, baǵdarshamnyń tyıym salynǵan sıgnalyna baǵynbaı, joǵary jyldamdyqpen júrýi joldaǵy qaýip-qaterdi edáýir arttyrǵany nazarǵa alyndy. Sondaı-aq, L.-nyń osy jyldyń basynan beri jyldamdyqty asyrý boıynsha 59 retten astam ákimshilik jaýapkershilikke tartylǵany eskerildi.
Sot mundaı jaza onyń túzelýine jáne qaıtalanatyn quqyq buzýshylyqtardyń aldyn alýǵa yqpal etedi dep eseptedi.
Sot qaýlysy zańdy kúshine engen joq.
Astanalyq polıseıler beınekamera arqyly jol erejesin buzǵandardy anyqtady
