Foto: Sý resýrstary jáne ırrıgasııa mınıstrligi
Jańa motosıklder kásiporynnyń 12 fılıaly arasynda bólindi. Atap aıtqanda, Aqmola fılıalyna – 1, Aqtóbe, Qaraǵandy, Qostanaı jáne Jetisý fılıaldaryna – árqaısysyna 5-ten, Batys Qazaqstan men Pavlodar fılıaldaryna – 6-dan tehnıka berildi. Sonymen qatar Shyǵys Qazaqstanǵa – 11, Abaı oblysyna – 12, «D. Qonaev atyndaǵy Úlken Almaty kanaly» fılıalyna – 20, Túrkistanǵa – 25, al Jambyl fılıalyna 29 motosıkl tabystaldy.
Mınıstrliktiń málimetinshe, jańa tehnıka sý retteýshilerdiń ýchaskeler arasynda jyldam qozǵalýyna múmkindik beredi. Bul óz kezeginde sýdy bólý jumystaryn tıimdi júrgizýge, gıdrotehnıkalyq nysandardyń turaqty jumysyn baqylaýǵa jáne jedel áreket etýge jaǵdaı jasaıdy.
Jańa tehnıka alǵan mamandardyń biri – «Qazsýshar» RMK Jambyl fılıaly Jıenbet óndiristik bólimshesiniń jas qyzmetkeri Aıdyn Joldas. Onyń aıtýynsha, buryn kún saıyn birneshe kanal aralap, ondaǵan shaqyrymdy jaıaý eńserýge týra kelgen.
«Negizgi mindetim – sharýa qojalyqtaryna sý jetkizý. Kúnine 5-6 kanal aralap, 60-70 shaqyrym jol júretinbiz. Keıde túnde de jumys isteımiz. Buryn kólik izdeýge nemese velosıpedpen barýǵa májbúr boldyq. Endi jańa motosıklder jumysymyzdy áldeqaıda jeńildetti», dedi ol.
GIZ Qazaqstannyń Sý resýrstary jáne ırrıgasııa mınıstrligine 240 jańa tehnıka beredi
Sonymen qatar jańa tehnıkamen qamtamasyz etilgen mamandardyń bir bóligi buryn maýsymdyq jumys atqaryp kelgen. Qazirgi tańda olar turaqty qyzmetke aýysyp, áleýmettik jaǵdaılary jaqsarǵan.
«Buryn jylyna 6 aı ǵana jumys isteıtinbiz. Qazir turaqty jumysqa ornalastyq, jalaqymyz 2 ese ósti, jyl boıy eńbek etip, demalysqa shyǵýǵa múmkindik aldyq», dedi «Qazsýshar» RMK Túrkistan fılıalynyń sý retteýshisi Perdehan Abzaqulov.
Aıta keteıik, byltyr «Qazsýshar» RMK tehnıkalyq parki 27% jańartylyp, sonyń nátıjesinde tehnıka jaldaý shyǵyndary 85% qysqaryp, jóndeý shyǵyndary 2 ese azaıǵan.
Sý resýrstaryn basqarý salasyn sıfrlandyrý tetikteri qaraldy
