«Búginde eki úlken tenderdiń qorytyndysy shyǵarylyp, otandyq óndirýshilermen sharttar jasaldy, sheteldik óndirýshilermen kelissózder júrgizildi. Qazirgi sátte 2019 jyly dárimen qamtamasyz etýge dári-dármekterdiń jalpy sanynan 83%-y satyp alyndy. Biryńǵaı dıstrıbıýtordyń qoımalaryna satyp alynǵan preparattardy jetkizý jeltoqsan aıynyń basynda bastalady, al 2019 jyldyń basynan bastap olar medısınalyq uıymdarǵa jóneltiletin bolady. 2019 jylǵa tegin dárimen qamtamasyz etýge satyp alynatyn dáriler men medısınalyq maqsattaǵy buıymdardyń tizimine 1144 pozısııa kirdi. Keler jyly qazaqstandyq farmzaýyttar shamamen 50 mlrd teńgege 494 ataýdy jetkizetin bolady. Bul júrek-qan tamyrlary, qant dıabeti, onkologııa, AITV jáne basqa aýrýlary bar emdelýshilerdi ambýlatorııalyq dárimen qamtamasyz etý úshin qajet dári-dármekter. Medısınalyq uıymdardan aldyn ala 203,5 mlrd teńgege tizim boıynsha ótinimder kelip túsken. Bıyl dıspanserlik esepte 45 aýrý boıynsha tirkelgen naýqastardy ambýlatorııalyq emdeý úshin 550-den astam dári-dármekterdiń ataýlary anyqtalǵan. Al aǵymdaǵy jyly ambýlatorııalyq dárimen qamtamasyz etýge 482 ataý satyp alynǵan. Qazaqstanda tirkelgen balamasy joq dárilik zattardyń 106 ataýy sheteldik óndirýshilerden tikeleı satyp alynady. Medısınalyq uıymdar bul preparattarǵa 43 mlrd teńge somaǵa aldyn ala ótinimder berdi. 2019 jyly IýNISEF jáne BUUDB halyqaralyq uıymdary arqyly 8,7 mlrd teńge somaǵa dárilik zattyń 25 ataýyn satyp alý josparlanyp otyr. Satyp alý qorytyndysy boıynsha qazirgi kezeńde 16 mlrd teńgeden astam bıýdjet qarajaty únemdeldi. 2018 jyly únemdeý esebinen bosatylǵan qarajat dárilerdiń anyqtalǵan tapshylyǵyn jabýǵa baǵyttalǵan», dedi L.Bıýrabekova.
«SK-Farmasııa» JShS Basqarma tóraǵasynyń mindetin atqarýshy Berik Shárip óz sózinde biryńǵaı dıstrıbıýtor óz jumysynda halyqpen ózara is-qımylǵa kóp kóńil bóletinin atap ótti.
«Qazir kompanııada halyqty tegin dárilermen qamtamasyz etý máseleleri boıynsha 1439 baılanys ortalyǵy iske qosyldy. Naýqastar Qazaqstannyń barlyq óńirinen 1439 nómirine kez kelgen qalalyq telefonnan tegin qońyraý shala alady. Baılanys ortalyǵynyń operatorlary tegin medısınalyq kómektiń kepildik berilgen kólemi sheńberinde dıspanserlik esepte turatyn jáne ambýlatorııalyq emdeýdi ala alatyn pasıentter úshin tegin bosatylatyn qajetti dári-dármekterdi jetkizýdiń merzimderi, kólemderi jáne josparlanǵan merzimi týraly aqparatty beredi», dedi ol.
Raýan QAIDAR,
«Egemen Qazaqstan»
