Jastyń qýaty – bilim-biliginde

Memleket basshysynyń usynysymen 2019 jyl Jastar jyly dep jarııalandy. Jastyń qýaty – bilimi men biliginde, birligi men patrıottyǵynda. Biz babalardan mıras bolǵan atamekenimizdi táýelsiz el ettik. Turmysy shalqyp, tútini túzý ushqan baqýatty memleketke aınaldyrdyq. Elbasynyń Jar­ly­ǵymen bıylǵy jyldy Jastar jyly dep jarııalaýy – jastar saıasatyna, jastar problemasyn sheshýge kózqarastardy túbegeıli qaıta qaraýǵa, ózgertýge baǵyt­talǵan ıgi is. 

Jyl boıy ár sharanyń sıpaty, nátıjesi barysyna monıtorıng júrgizip, jaýapty adamdardyń kásibı deń­geıi durys baǵalanyp otyrý kózdelýde. Jaqsy nátıje kór­set­kenderdi marapattaý, elge nasıhattaýmen qatar, nátıjesiz jumys istep, qarjyny tıim­siz jaratqan adamǵa qarsy qoldanylatyn amal-sharanyń túrlerin ázirleý josparlanýda. Tek osylardy qol­ǵa alǵan­da ǵana jyldan durys nátıje kútý­ge bolady.

Erkebulan BAZARBAEV,

Merki aýdany ákimdigi ishki saıasat bólimi «Jastar resýrstyq ortalyǵy» KMM-niń dırektory

Jambyl oblysy
 

Mamandyq tańdaýda qatelespeıik

Memleket basshysy jastardy qoldaý jóninde Úkimetke burynnan tapsyrma berip keledi. Osyǵan oraı Qyzylorda oblysynyń ákimi Qyrymbek Kósherbaev jastardy qoldaýda ózge aımaqtarǵa úlgi bolatyn­daı bastamalar kótergen. Kó­r­shi­les Reseıde bilim alyp, elge oral­ǵan alǵashqy túlekter – osy bas­tamanyń oń nátıjesi.

Men de oblys ákimdiginiń qoldaýymen osy múmkindikke ıe bolǵan jas retinde salystyra aıtar bolsam, eki eldiń jastary birdeı deńgeıde. Memleket tarapynan jasalatyn jaǵdaıǵa keler bolsaq, qoǵamdyq kólik jolaqysyna jeńildikke bizde mektep oqýshylary ǵana ıe bolsa, Reseıde stýdentter men magıstranttarǵa da jeńildik qarastyrylǵan. Menińshe, bizdiń el jastaryna mamandyq tańdaýda, JOO-ǵa qujat tapsyrarda kóbirek kómektesý qajet. Oqýshy kezinde durys motıvasııa berilip, álemdik deńgeıdegi JOO-ǵa ne jumys ornyna kerekti qujattar tizimin kórsete otyryp, bolashaqtaǵy perspektıvalarmen qyzyqtyra bilse jaqsy bolar edi. Áıt­pese biren-saran ábden izde­nip, zertteıtinder bolmasa, kóp­shiligi shetelde oqý múm­kindi­ginen beıhabar qalyp jatady. Dál osy sekildi, otandyq kásip­oryndardyń qoldaýy, jastarǵa qarastyrylatyn jeńildikter týraly jastar arasynda úgit-nasıhat júrgizilse, artyqtyq et­peıdi. «Saıtta bar, ınternet­te tur ǵoı» degenmen, kóbi dál ýa­qy­tynda bilmeı qalyp jatady.

Elbasynyń aımaqtarda Nazarbaev Ýnıversıtet sııaqty jetekshi oqý oryndarynyń bolý qajettigi týraly aıtqan oıy jastarymyzdyń shetelde alǵan bilimdi ózimizde de qol jetkizýge bolatyndyǵyn kór­setedi. О́ıtkeni sapaly bilim kútken údege jetkizedi.

Elaman MEŃDIQUL,

«Máskeý bolat jáne qorytpalar ınstıtýty» ulttyq zertteý tehnologııalyq ýnıversıtetiniń túlegi

Qyzylorda oblysy