Shırek ǵasyr boıy Qazaqstan qazynashylyǵy elimizdiń bıýdjet júıesiniń bir bólshegi retinde qurylý men damýdyń úlken jolyn artqa tastady.
«1994 jyldyń 27 qańtarynda halyqtyń ál-aýqatyn kóterýge baǵyttalǵan memlekettik qyzmetterdi sapaly atqarýdy qamtamasyz etetin, turaqty bıýdjetke qol jetkizýde memlekettik qarjyny tıimdi basqarý quraly retinde Qazaqstan Prezıdentiniń Jarlyǵymen elimizdiń Qazynashylyq bas basqarmasy quryldy. 25 jyl ishinde Qazynashylyq organdary bıýdjettik saıasatty iske asyryp, memleket qarajatyn tıimdi ári maqsatty basqarýǵa zor úles qosyp keledi» dedi Qarjy vıse-mınıstri Berik Sholpanqulov.
Vıse-mınıstrdiń aıtýynsha, búginde Qazynashylyqtyń qazaqstandyq ózindik úlgisi qalyptasty. Qazynashylyqtyń aqparattyq júıesi halyqaralyq sarapshylardyń joǵary baǵasyna ıe. Sarapshylardyń pikirinshe, Qazaqstanda TMD boıynsha úzdik zamanaýı ıntegrasııalanǵan aqparattyq júıe qalyptasqan. Qazynashylyqtyń aqparattyq júıeleri 13 myń memlekettik mekemege, 5 myńnan astam shotqa, 3,5 myńdaı paıdalanýshyǵa onlaın rejımde qyzmet kórsetýge múmkindik beredi.
Jıyn sońynda bıýdjettik saıasatty iske asyryp, memleket qarjysyn maqsatty basqarýǵa úles qosyp júrgen qyzmetkerler marapattaldy.
Qazynashylyq organdarynyń jedel qyzmet kórsetýine, memlekettik baǵdarlamalardy oryndaýyna sol aımaqtyń búkil tynys-tirshiligi baılanysty. Qazynashylyq organdary 205 bólimsheden turatyn barlyq basqarmada 3080 memlekettik qyzmetshi eńbek etedi. Qazynashylyq organdary buryn bir qarjylyq qujatty 2-3 kúnde óńdeıtin bolsa, qazir barlyǵy dıstansııalyq túrde 6 saǵattan aspaıtyn ýaqytta óńdeledi.2018 jyldan bastap qazynashylyq júıesi bıýdjettiń tórtinshi deńgeıine qyzmet kórsete bastady. Bul tusta da qazynashylar Qarjy mınıstrliginiń strategııalyq josparyn tolyqtaı oryndap, 1062 jergilikti bıýdjetti engizdi.
Aıta ketý kerek, Qazynashylyq komıteti halyqaralyq arenada da tyǵyz jumys jasaıdy: Halyqaralyq Qazynashylyqtar Qaýymdastyǵy – Pempal aıasynda osy qaýymdastyqqa múshe 23 elmen Qazynashylyq salasyn jetildirý, damytý máseleleri boıynsha qarym-qatynas ornatqan.
Aqmaral AǴZAMQYZY,
«Egemen Qazaqstan»
