J. Qasymbek 2018 jyly qurylys salasy turaqty ósim qarqynyn kórsetkenin jáne 2017 jyldaǵy deńgeıge qaraǵanda — 4,1%, eńbek ónimdiliginiń ósimi — 9%-dy quraǵanyn aıtty. Turǵyn úı qurylysyna salynǵan ınvestısııalar shamamen 8%-ǵa artty.
«Aıta keterligi, "Nurly jer" memlekettik baǵdarlamasy boıynsha memlekettik qarajattyń 1 teńgesine 6-7 teńge jeke ınvestısııalar tartylǵan. Rekordtyq 12,5 mln m² jańa turǵyn úı paıdalanýǵa berildi. Bul 2017 jylǵy deńgeıden 12%-ǵa joǵary. 2018 jyly bir turǵynǵa turǵyn úıdi paıdalanýǵa berý 0,68 m² qurady. Bul TMD elderi arasyndaǵy eń joǵarǵy kórsetkish. Salystyryp qaraıtyn bolsaq, Reseıde – 0,54 m², Belarýste – 0,40 m², О́zbekstanda – 0,36 m² quraıdy. Turǵyn úı qurylysynyń qarqynyn ulǵaıtyp jatyrmyz», — dedi J. Qasymbek.
Onyń aıtýynsha, 113 myńnan astam otbasy ózderiniń turǵyn úı jaǵdaılaryn jaqsartty, sonyń ishinde 14 myńnan astam otbasy memlekettik qarajat esebinen arendalyq jáne nesıelik baspanamen qamtamasyz etildi. Barlyq óńirlerde turǵyn úıdi paıdalanýǵa berýde oń qarqyn baıqalady.
Buǵan qosa, «7–20–25» baǵdarlamasyn sátti júzege asyrý maqsatynda ınjenerlik kommýnıkasııalar qurylysyna 100 mlrd teńgege deıin qarjylandyrý ulǵaıtyldy. Astana, Almaty jáne Shymkent qalalarynda jumys isteıtin jastar úshin jyl saıyn keminde 1 myń arendalyq páter salý jónindegi Memleket basshysynyń tapsyrmasyn oryndaý úshin qarjylandyrý tetikteri men kózderi anyqtaldy.
«Jalpy, 2019 jyly 13 mln m² jańa turǵyn úıler salýdy josparlap otyrmyz. Sonyń arqasynda 118 myńǵa jýyq otbasy baspanamen qamtamasyz etiledi. Negizgi mindet – 2030 jylǵa deıin bir adam basyna maqsatty kórsetkishti 30 m² jetkizý. Qazirgi kezde bul kórsetkish 21,5 m² quraıdy», — dedi mınıstr.
Sonymen qatar, J. Qasymbek otandyq qurylys materıaldaryn qoldaný máselesi erekshe baqylaýǵa alynǵanyn atap ótti.
«Eger búginde turǵyn úı qurylysynda shamamen 86% qazaqstandyq ónim bolsa, 3 jyl ishinde bul kórsetkishti 90%-ǵa deıin kótere alamyz dep esepteımiz. Bul qurylys materıaldary óndirisin yntalandyrady jáne jalpy qurylys salasyna qosymsha serpin beredi. О́tken jyldyń qorytyndysy boıynsha qurylystaǵy qazaqstandyq qamtý úlesi 2017 jylǵy deńgeıden 5%-ǵa artyp, 77% qurady, onyń ishinde turǵyn úı qurylysynda – 86%», — dedi J. Qasymbek.
