Qazir oblysta «Jibek joly jastary» volonterler qozǵalysy bar. Jalpy, óńir boıynsha myńnan astam eriktilerdiń derekqory jasalǵan. Jýyrda ǵana volonterler 3 apta boıy Taraz qalasyndaǵy 450-ge jýyq qamqorlyq pen qoldaýǵa muqtaj otbasyny anyqtady.
Osy oraıda, oblystyq Jastar saıasaty máseleleri basqarmasynyń uıymdastyrýymen Taraz qalasynda qaıyrymdylyq aksııasy ótkenin de atap ótken jón. Aksııa aıasynda 220 turmysy tómen otbasyna kómek kórsetildi. Onyń ishinde kóp balaly otbasylar, jalǵyzbasty analar, múmkindigi shekteýli balalary bar jandar. Shara barysynda olarǵa un, kúnbaǵys maıy, shaı, sheker, kúrish, makaron, qaraqumyq sııaqty azyq-túlik tabystaldy. Ár otbasyna kıim-keshekter de taratyldy.
− Aldaǵy ýaqytta qaıyrymdylyq dúkenderi iske qosylady. Volonterler men kásipkerlerdiń tyǵyz baılanysyn ornata otyryp, bes jerge arnaıy jáshikter qoıylady. Sonymen qatar azyq-túlik, kıim-keshek syndy tutyný zattaryn jınaqtap, taratý jumystary qolǵa alynady. Bul jumys júıelenip turaqty túrde jalǵasyn tabady, − deıdi basqarma basshysy Mádı Máten.
Aıta keteıik, basqarmanyń memlekettik áleýmettik tapsyrysy sheńberinde «Volonterler mektebiniń jumysyn júrgizý, úılestirý jáne olardyń áleýetin damytýǵa baǵyttalǵan is-sharalardy uıymdastyrýǵa» 15 mıllıon teńge qarjy qaralǵan. Mundaı qaıyrymdylyq shara barlyq aýdanda bir mezette uıymdastyrylatyn bolady.
Hamıt ESAMAN,
«Egemen Qazaqstan»
Jambyl oblysy
