«Áziret-Sultan» memlekettik tarıhı-mádenı qoryq-mýzeı dırektory Ahmetjanov Nurbolat Qadyruly, «Turkestan Tour» týrıstik agenttiginiń dırektory Ibragımova Merýert Abılaıatqyzy jáne «Turan-Saıahat» týrıstik fırmasynyń dırektory Ýsentaev Maqsat Fazylbekuly memorandýmǵa qol qoıyp, Túrkistan qalasyna kelýshi týrıster sanyn arttyrý jáne olarǵa jaǵdaı jasaý boıynsha kelisti.
- Jyl basynan beri elimizdegi kóptegen týrıstik agenttiktermen memorandým túze otyryp, Túrkistan qalasyn nasıhattaý jáne dáripteý, kelýshiler sanyn arttyrý boıynsha aýqymdy jumystar qolǵa alynǵan. Osy oraıda, sheteldik týrıstik ortalyqtarmen de baılanys ornatylyp, kelissózder júrýde. Memleket basshysynyń Túrkistan qalasyna oblys ortalyǵy mártebesin berý týraly sheshimi tarıhı oqıǵaǵa aınalǵany belgili. Elbasynyń Túrkistan oblysyna sapary barysynda «Áziret-Sultan» mýzeı-qoryǵyn IýNESKO-nyń biregeı eskertkishi retinde qalpyna keltirý jospary bekitildi. Aldaǵy ýaqytta, Túrkistanǵa kelýshiler kóptegen tarıhı málimetter men nysandardy kóretin bolady. Olardyń qatarynda Kúltóbe qalashyǵy, Han ordasy, Han meshiti jáne kóne Túrkistan kóshesi synda kóptegen tarıhı oryndar bar. Sonymen qatar, «Áziret Sultan» memlekettik tarıhı-mádenı qoryq-mýzeıine qarasty 99 tarıhı-mádenı, rýhanı eskertkishter de kelýshiler nazaryna usynylady»,-dedi «Áziret Sultan» memlekettik tarıhı-mádenı qoryq-mýzeıiniń dırektory Ahmetjanov Nurbolat Qadyruly.
Aıta ketsek, «Áziret Sultan» qoryq-mýzeıine qarasty tarıhı oryndardy anyqtaý jáne qaıta jańartý jumystaryna arnalǵan jobalar ejelgi rımdik Pompeı qalasynyń mýzeıi, Osman ımperııasynyń «Topkapy» saraıy, Ierýsalım qalasy sııaqty álem eskertkishteriniń tájirıbesine súıene otyryp, ázirlendi. Olarǵa jyl saıyn osy elderdiń ekonomıkasyna úlken kiris ákeletin mıllıondaǵan týrıster barady.
Osy oraıda 2023 jylǵa qaraı Túrkistanǵa keletin týrısterdiń sany 5 mln asa adamdy quraıtyn bolady, olardyń kelý ýaqyty da 3 saǵattan 4-5 kúnge deıin ulǵaımaq.
Osy rette atalǵan kompanııa basshylary da sheteldik týrıstermen qarym-qatynas jasaı otyryp, Túrkistan qalasynyń tarıhı-mádenı kelbetin birlese tanystyrýǵa kúsh salýǵa ýaǵdalasty.
