Búginde aınalamyzda oryn alyp jatqan túrli oqıǵalar adamnyń oıyn san-saqqa júgirtpeı qoımaıdy. Qapııada kóz jumǵan bala, tárbıege kónbegen bala, búkil ómirimizdiń tutqasy bolǵan bala, óz isiniń ustasy bolǵan bala... Qysqasy, búkil dúnııa bir perzenttiń aınalasynda shyr kóbelek aınalyp tur. «Balań jaqsy bolsa, jerdiń ústi jaqsy, balań jaman bolsa, jerdiń asty jaqsy» degen de osyndaıda aıtylady.
Aıtqandaı, ul-qyzdy aıtyp otyryp, búgingi áleýmettik máselelerden attap kete almaıtynyńyz aqıqat. Kóp balaly analardyń jaǵdaıyn jasaý, úrim-butaǵymyzdyń keleshegin qamdaý sekildi kókeıkesti suraqtar kún saıyn aldymyzdan shyǵatyn boldy. Baıaǵynyń adamdary «Alty ul tapqan anany hanym dese bolady» dep áspettese, búgingiler áýpirimdep júrip tórt bala tapqan áıeldi tóbesine kóterýge tıisti zamanǵa da tap kelgen syńaı bar.
Dosaı bı aıtqandaı:
Bir balasy bardyń shyǵar-shyqpas jany bar,
Eki balasy bardyń bolar-bolmas hali bar,
Úsh balasy bardyń úsh rýly elde maly bar,
Tórt balasy bardyń tórt qubylasy teń bolar,
Bes balasy bardyń des bermeıtin jóni bar,
Alty balasy bardyń almaı qoımas sany bar,
Jeti balasy bardyń almaı qoımas jany bar,
Segiz balasy bardyń sergeldeńge salar kári bar,
Toǵyz balasy bardyń tolǵandyrar joly bar.
On balasy bardyń orda buzar qoly bar, – dep búkil dalanyń pálsafasyna qalaı-qalaı qapysyz «dıagnoz» qoıǵan dersiz!
Endeshe, aıtpaǵymyz, osynshama oıdy qozǵap otyrǵan japyraǵy jaıqalǵan báıterekteı bir áýlettiń sýreti.
– 1978 jyly túsirilgen sýretti «Atasynyń balalary» dep ataǵanym este. Bul fotoda Qyzylorda oblysy Syrdarııa aýdany Amankeldi aýylynyń turǵyny, II Dúnıejúzilik soǵysqa bastan-aıaq qatysqan Nurmahan Ábenov degen kisi bir ózinen taraǵan nemere-shóbereleriniń ortasynda otyr. Negizi, kempiri on bala tapqan. Sonyń úsheýi tiri qalǵan kórinedi. Osy áýlettiń ıesi - Nurmahan aǵamyz sol úsh baladan 9 nemere, 20 shóbere kórgen baqytty adam, – deıdi qyzylordalyq ardager fototilshi Bolat Omarálıev.
Aınash ESALI,
«Egemen Qazaqstan»
ALMATY
