О́tken jylǵy jumystardyń nátıjesi týraly departament basshysy Aıbek Paıaev baıandady. Onyń sózinshe, eseptik kezeń ishinde oblystyń shoǵyrlandyrylǵan bıýdjeti alǵash ret 534,6 mlrd teńgege ósip, jyldyq jospardan tys 184,2 mlrd teńge túsken.
Byltyrǵy jyldyń qorytyndysyn talqylaýdan soń oblys ákimi 2019 jylǵa arnalǵan birqatar basym baǵyttardy belgiledi.
Eń aldymen, Berdibek Saparbaev kóleńkeli kirispen kúres jumysyn kúsheıtý kerektigin atap ótti.
Oblys ákimi: «Elbasy kóleńkeli ekonomıka úlesin úsh jyldyń ishinde kem degende 40% tómendetý mindetin qoıdy. Memlekettik kirister departamenti ózge quzyrly memlekettik organdarmen birlesip kóleńkeli ekonomıkamen, ásirese aqshany qoldy qylatyn bir kúndik fırmalarmen kúresti jalǵastyrýy qajet. Tabystaryn jasyryp, salyqtan jaltaratyn barlyq kásipkerlerdi kóleńkeden shyǵarý kerek. Olar ásirese – ishimdik óndirýmen jáne satýmen aınalysatyn meıramhanashylar, býkmekerlik kásiporyndardyń ıeleri. Olardyń barlyǵymen de jumystar kúsheıtilýi tıis»,- dep atap ótti.
Memlekettik kirister departamentiniń búginde bir jyldan astam ýaqytqa sozylatyn qosymsha rezervterdi anyqtaý, tirkelmegen múlikterdi tirkeý, bereshekterdi tómendetý, salyq aýdıtiniń tıimdiligin artyrý, jemqorlyqtyń aldyn alý, kásiporyndardy ońaltý jáne bankrottyq rásimderin tezdetý boıynsha osy jylǵy basym mindetteri anyqtaldy.
Budan basqa, Berdibek Saparbaev 2019 jyly 1 qańtarda Memleket basshysynyń tapsyrmasymen engizilgen kásipkerler úshin salyq raqymshylyǵyn túsindirý jumystaryn kúsheıtýdiń mańyzdylyǵyn atap ótti.
Salyq raqymshylyǵy shaǵyn jáne orta bıznes sýbektileriniń ósimpuly men aıyppulyn salyqtyń negizgi somasyn 31 jeltoqsanǵa deıin tóleý shartymen joıýdy qarastyrady.
Qazirgi tańda Aqtóbe oblysy boıynsha shaǵyn jáne orta bıznestiń 4250 sýbektisi raqymshylyqqa iligip tur. Olardyń jalpy salyq qaryzy 27 mlrd teńgeni qurasa, onyń 10 mlrd teńgeden astamy – kásipkerler negizgi qaryzdaryn japqan jaǵdaıda joıylatyn ósimpuldar men aıyppuldar. Osylaısha, oblys bıýdjeti qosymsha 16 mlrd teńgege tolyǵady.
Temir Qusaıyn,
«Egemen Qazaqstan»
