«Qaıyrymdylyq kerýeni» máresine jetti

Qaıyrymdylyq isterdi qol­daý, nasıhattaý, belsendi aza­mattyq bastamany damytý maq­satynda jarııalanǵan baıq­aýdyń ótinishteri byltyrǵy qarasha men bıylǵy aqpan araly­ǵynda qaraldy. 

Quttyqtaý sóz alǵan D.Nazar­baeva: «Bul baıqaý eli­miz­­diń naǵyz patrıottaryn, azamat­tardyń ıgi isterin, muqtaj adam­darǵa qamqorlyq kórsetip júrgen jomart jandardy anyq­tap berdi. Olar – úlken júrekti qarapaıym adamdar», deı kele, baıqaýǵa ár saladan, ár aı­maqtan 97 ótinim túskenin aıt­ty. Olardyń arasynda ká­sip­­­kerler, qoǵamdyq mekeme, bi­lim salasynyń mamanda­ry, múm­kindigi erekshe jandar, qu­qyq qorǵaý salasynyń qyzmet­ker­­leri, tipti mektep oqýshylary bar. 

Baıqaý jeńimpazdary 5 ata­lym boıynsha anyqtalǵan. Teri­den ulttyq naqyshta zattar shyǵa­ra­tyn qaraǵandylyq Symbat Elik­baeva «Asar» atalymynda je­ńim­paz atandy. Ol árdaıym b­a­la­larǵa tegin sheberlik sabaqtar ót­kizedi. Al «Týǵan jer» nomınasııasynda Atyraýdan kelgen Arman Haırýllın jeńiske jetti. Ol týǵan qalasynda 2017 jyly 10 myń kóshet taratý jáne otyrǵyzý boıynsha aksııa uıymdastyrǵan. Aqmola oblysynyń týmasy Uldana Sovet «Batyl júrek» nomınasııasynda úzdik dep tanyldy. Ol – baıqaýdyń eń jas jeńimpazy. Uldana 2017 jylǵy qarashada janyp jatqan úıden kishi inisi men eki sińlisin alyp shyqqan. Almaty qalasynyń turǵyny Rasıma Temirbaeva «Meıirim jolynda» nomınasııasynda jeńiske jetti. Ol den­saý­lyǵyndaǵy qıyndyqqa qara­­mas­tan, qarııalardy kúnde­likti tamaqtandyrady. Qazir kúni­ne 400 túski as taratatyn eki tamaq­tandyrý orny qyzmet etedi. «Qaıy­rym­dylyq tarıhy» nomınasııa­synda Soltústik Qazaq­stan oblysynan Aleksandra Kond­ratova jeńis tuǵyrynan kórindi. «Nedelıa SK» gazetiniń jýr­nalısi A.Kondratovanyń muq­­taj jandar jaıynda jazǵan ma­qa­lalary arqasynda adamdarǵa naqty kómek kórsetilgen. 

Budan bólek Qor eki arnaıy syı taǵaıyndady. Oǵan kompıýter, noýtbýk qurastyryp, olardy jaǵdaıy tómen, kóp balaly otbasynan shyqqan, ata-ana qamqorlyǵynsyz qalǵan, múgedek, naýqas balalarǵa syılaıtyn Ravıl Nasıfýlın jáne Qosshy aýylynda 200 ba­la­ǵa arnalǵan aǵylshyn tilin tereńdetip oqytatyn, túr­li úıir­meler júrgizetin 12 kabı­net­ti mektep saldyryp jatqan Saıra Mataıbaeva ıe boldy. 

Jeńimpazdarǵa dıplom, baıqaý statýetkasy jáne «Oqjetpes» emdeý-saýyqtyrý keshenine joldama berildi. Al batyr Uldana Sovetke qosymsha noýtbýk syıǵa tartyldy. 

Uıymdastyrýshylar alǵash ótip otyrǵan bul baıqaýdy jyl saıyn ótkizý josparda bar ekenin jetkizdi. Aıta keteıik, sharany Elbasy Qory men Qazaqstannyń isker áıelderi qaýymdastyǵy uıymdastyrǵan. 

Aıdana ShOTBAIQYZY,

«Egemen Qazaqstan»