Baıqaýǵa qatysýǵa ekonomıkanyń qurylys ónerkásibi, elektr energetıka salasy, munaı ónerkásibi, taý-ken ónerkásibi, aqparattyq tehnologııalar salasy (IT) boıynsha qazaqstandyq iskerlik birlestikterdiń ókilderi jáne jumys berýshiler shaqyryldy.
Atalǵan shara jumys berýshilerge óz salasy boıynsha úzdik kolledj stýdentterin tańdap alýǵa, kásibine qajetti jańa ıdeıalar men ózekti máselelerge daıyn sheshim qabyldaýǵa, brendti tanymal etý jáne kompanııanyń naryqtaǵy tanymaldylyǵyn arttyrýǵa orasan zor múmkindik beredi.
«Elordada tuńǵysh ret «Hakaton» ıdeıalar baıqaýy bastaldy. Bul sharaǵa elimizdegi tehnıkalyq jáne kásiptik bilim berý mekemeleriniń stýdentteri qatysýda. Eń úzdik bıznes ıdeıalar jumys berýshiler tarapynan usynylǵan grantqa ıe bolady. Sondaı-aq taý-ken ónerkásibi, qurylys, IT men munaı-gaz salasynda óz tájirıbelerin shyńdaýǵa múmkindik almaq. Olarǵa qoıylatyn negizgi talap – óndiris ornyn damytý jáne túıtkildi máselelerdi tez arada sheshý. Atalǵan jarysqa elimizdiń 11 aımaǵynan 150-ge tarta stýdent qatysty», deıdi Astana qalasy bilim basqarmasy tehnıkalyq jáne kásiptik bilim berý bóliminiń basshysy Saltanat Basyqaraeva.
«Egemen-aqparat»
