Elimiz bastamalaryna erekshe nazar
Seısenbi, 20 qarasha 2012 7:12
Jaqynda Djıbýtıde Islam Yntymaqtastyǵy Uıymy (IYU) Syrtqy ister mınıstrleriniń keńesi ashylyp, oǵan Qazaqstan Respýblıkasynyń Syrtqy ister mınıstri Erlan Ydyrysov bastaǵan qazaqstandyq delegasııa qatysty, dep habarlady Qazaqstan Respýblıkasy Syrtqy ister mınıstrliginiń baspasóz qyzmeti.
Seısenbi, 20 qarasha 2012 7:12
Jaqynda Djıbýtıde Islam Yntymaqtastyǵy Uıymy (IYU) Syrtqy ister mınıstrleriniń keńesi ashylyp, oǵan Qazaqstan Respýblıkasynyń Syrtqy ister mınıstri Erlan Ydyrysov bastaǵan qazaqstandyq delegasııa qatysty, dep habarlady Qazaqstan Respýblıkasy Syrtqy ister mınıstrliginiń baspasóz qyzmeti.
Konferensııanyń ashylýynda sóz sóılegen Qazaqstan Respýblıkasy syrtqy saıasat vedomstvosynyń basshysy Qazaqstannyń osy Uıymǵa 2011 jyldyń 28 maýsymy men ústimizdegi jyldyń 15 qarashasyna deıin sozylǵan tóraǵalyǵynyń qorytyndysyn shyǵardy. Ol Qazaqstan dıplomatııasy tarıhyndaǵy osy mańyzdy oqıǵa kúrdeli geosaıası jáne jahandyq ekonomıkalyq syn-qaterler men IYU geografııasynda oryn alǵan dramalyq saıası ózgerister kezeńinde ótkenin atap kórsetti.
Mınıstr Qazaqstan Respýblıkasynyń Prezıdenti Nursultan Nazarbaevtyń 2011 jyldyń 28 maýsymynda Astanada ótken IYU Syrtqy ister mınıstrleriniń 38-shi keńesindegi baǵdarlamalyq sózi qazaqstandyq tóraǵalyqtyń kún tártibin belgilese, onda ıslam álemin jańǵyrtý, onyń básekege qabilettiligin joǵarylatý, áleýmettik-ekonomıkalyq progress, halyqaralyq arenada IYU-nyń rólin nyǵaıtý jáne órkenıetaralyq únqatysýdy damytý máselelerine basa nazar aýdarylǵanyn kóldeneń tartty.
E.Ydyrysov Astanadaǵy SIMK barysynda Islam Konferensııasy Uıymyn Islam Yntymaqtastyǵy Uıymyna ózgertý týraly tarıhı sheshim qabyldanǵanyn atap óte kelip, Astananyń tóraǵalyǵy aıasynda, tutastaı alǵanda, 40 is-shara, onyń ishinde, 10 is-shara mınıstrlikter deńgeıinde uıymdastyrylǵanyn, osynyń nátıjesinde, Uıymnyń túrli organdarynyń qyzmeti aıtarlyqtaı belsendi bola túskenin aıtty.
Máselen, Qazaqstan bastamasymen 7-shi Búkilálemdik ıslam ekonomıkalyq forýmy, IYU-ǵa múshe elder densaýlyq saqtaý mınıstrleriniń 3-shi konferensııasy, qorshaǵan orta mınıstrleriniń 5-shi kezdesýi sekildi asa iri is-sharalar uıymdastyryldy. Atalǵan kezeńde Somalıge gýmanıtarlyq kómek retinde 500 mln. AQSh dollary kóleminde qarajat jınaldy. Muny Uıymnyń asa iri tabysy dep baǵalaǵan jón.
Qazaqstannyń kópshilik tarapynan qoldaý tapqan bastamalarynyń qatarynda Qazaqstan Respýblıkasynyń Prezıdenti Nursultan Nazarbaevtyń IYU-nyń azyq-túlik qaýipsizdigi júıesin qurý týraly usynysyn ataýǵa bolady. О́ıtkeni, bul bastama negizinde Astanada Uıymnyń jańa ınstıtýty – IYU-nyń azyq-túlik qaýipsizdigi jónindegi Ofısin qurý týraly sheshim qabyldandy.
Islam Damý bankimen (IDB) yntymaqtastyq salasynda ózara yqpaldastyqqa aıtarlyqtaı irgetas qalandy – IDB-men eldik áriptestik strategııasy jasaldy. Bul Qazaqstan Respýblıkasyndaǵy túrli jobalardy júzege asyrý úshin aıtarlyqtaı qarjy kózderin tartýǵa, sondaı-aq Qazaqstan basshysynyń kelesi bir bastamasy – shaǵyn jáne orta bıznesti damytý úshin qor qurý týraly bastamany júzege asyrýǵa múmkindik beredi.
Astana IYU-nyń ishki reformalaryna baǵyttalǵan birqatar qadamdarǵa, onyń EO-men, EQYU-men, ShYU-men, AО́SShK-men jáne Álemdik jáne dástúrli dinder kóshbasshylarynyń sezderimen yntymaqtastyǵyn keńeıtýge bastamashylyq jasady. Qazaqstan Respýblıkasynyń ıadrolyq taratpaý, Aýǵanstandaǵy jaǵdaıdy qalpyna keltirý, G-Global-dy damytý, sondaı-aq Uıymnyń G-20-men ózara is-qımylyn ilgeriletý boıynsha bastamalary musylman qaýymy tarapynan qoldaý tapty.
Astanada IYU-nyń adam quqyqtary jónindegi táýelsiz turaqty komıssııasyn qurý týraly sheshim qabyldanýy mańyzdy qadam boldy.
Qazaqstan SIMK-niń tóraǵasy retinde Taıaý Shyǵystaǵy beıbitshilik pen qaýipsizdik máselelerin talqylaýda salmaqtylyq pen tepe-teńdik kórsetti. Bizdiń elimiz Vatıkanda elshiler deńgeıinde IYU-nyń delegasııasyna jetekshilik jasap, Palestına aýmaǵyndaǵy katolık shirkeýiniń menshik máselelerin talqylady.
Forýmda sóz sóılegen IYU-nyń Bas hatshysy Ekmeleddın Ihsanoǵly, Djıbýtı prezıdenti Ismalı Omar Gelle, IYU-ǵa múshe elder syrtqy saıasat vedomstvolarynyń basshylary Qazaqstan Respýblıkasynyń Uıymǵa tóraǵalyǵyn joǵary baǵalap, Prezıdent Nursultan Nazarbaev ilgeriletken bastamalardyń kókeıkestiligin atap kórsetti. Al bul bastamalar Islam ýmmasynyń kún tártibinde turǵan asa mańyzdy problemalardy qozǵaıdy.
Olardyń sózderine qaraǵanda, Qazaqstan tóraǵalyq laýazymynda ózin kúrdeli saıası úderisterde konstrýktıvti sheshim qabyldaýǵa qabiletti tolysqan jáne jaýapkershilikti memleket retinde kórsetti. Osy oraıda, Qazaqstannyń álemge ekonomıkasy damyǵan, etnosaralyq jáne dinaralyq kelisimdi saqtap otyrǵan tıimdi memlekettik qurylys qalyptastyryp, dúnıe júzine úlgi kórsetip kele jatqan el ekenin de atap kórsetken abzal. Atap aıtqanda, IYU-nyń Bas hatshysy, qazaqstandyq tóraǵalyqtyń joǵary mazmuny men kásibıligin atap óte kelip, onyń Uıym tarıhyndaǵy asa bir jarqyn bet bolyp qalatynyn kóldeneń tartty.
Konferensııa jumysy sheńberinde E.Ydyrysov birqatar ekijaqty kezdesýler ótkizdi. Aýǵanstan syrtqy saıasat vedomstvosynyń basshysy Z.Rasýlmen, Egıpet syrtqy saıasat vedomstvosynyń basshysy M.Ámirmen, Iran syrtqy saıasat vedomstvosynyń basshysy A.Salıhımen, Saýd Arabııasy syrtqy saıasat vedomstvosynyń basshysy, Hanzada Ábdel Ázız ben Abdallamen, Gambııa syrtqy saıasat vedomstvosynyń basshysy S.Vaffa-Ogoomen, Gvıneıa syrtqy saıasat vedomstvosynyń basshysy B.Fofanomen, Gaıana syrtqy saıasat vedomstvosynyń basshysy K.Rodrıges-Bırketpen, AQSh prezıdentiniń IYU-daǵy Arnaıy elshisi R.Hýseınmen kelissózder barysynda halyqaralyq, óńirlik jáne ekijaqty yntymaqtastyqtyń kókeıkesti máseleleri talqylandy. Qazaqstan Respýblıkasynyń Astanada halyqaralyq EKSPO-2017 kórmesin ótkizý, sondaı-aq Qazaqstannyń 2017-2018 jyldary BUU Qaýipsizdik Keńesiniń turaqty emes músheliginen oryn alý tapsyrystaryn ilgeriletý máselelerine basa nazar aýdaryldy. Qazaqstandyq mınıstr, sonymen qatar, IYU-nyń Bas hatshysy E.Ihsanoǵlymen jáne Islam Damý bankiniń prezıdenti M.Álımen kelissózder júrgizdi.
«Egemen-aqparat».
