Ákesiniń qylmysyn qyzy aıyptaıdy
Juma, 28 qyrkúıek 2012 6:55
Ońtústik Koreıada (resmı ataýy – Koreıa Respýblıkasy) bıyl saılaý ótedi. Prezıdenttikten úmitkerdiń biri Pak Kyn He – bıliktegi «Senýrý» partııasynyń ókili. Onyń basty ereksheligi – ol eldi 1961-1978 jyldarda bılegen dıktator Pak Chon Hıdiń qyzy.
Juma, 28 qyrkúıek 2012 6:55
Ońtústik Koreıada (resmı ataýy – Koreıa Respýblıkasy) bıyl saılaý ótedi. Prezıdenttikten úmitkerdiń biri Pak Kyn He – bıliktegi «Senýrý» partııasynyń ókili. Onyń basty ereksheligi – ol eldi 1961-1978 jyldarda bılegen dıktator Pak Chon Hıdiń qyzy.
Bul erekshelik bılik úshin kúreste oǵan kómektese me, joq zııanyn tıgize me? Biraz elde aıtýly qaıratkerlerdiń, bılik tizginin ustaǵan tulǵalardyń balalary (kóbine qyzdary), bir jaǵy áke bedeli kómegimen de, jeńiske jetip jatady. Al Pak Kyn He úshin búkil álemge aıtýly dıktator retinde belgili bolǵan ákesiniń orny qandaı bolmaq degende, sarapshylardyń pikiri ártúrli: bireýleri kómektesedi dese, ekinshileri qarsy pikirdi qoldaıdy.
Sirá, úmitker ony qalaı paıdalana biledi degen úshinshi pikirdiń qısyny kópteý-aý. Al Pak Kyn He osy jolǵa aıryqsha mán berip otyr. Ol jaqynda ǵana arnaýly baspasóz jıynyn ótkizip, óziniń ákesiniń bıligi jaıynda málimdeme jasady. Jáne ol halyq arasynda úlken pikir týdyrdy. «Úkimettiń zańǵa syıymsyz áreketterinen japa shekkenderdiń barlyǵynan, olardyń jaqyn týystarynan basymdy ıip turyp keshirim suraımyn», dedi ol. Ákesi qoldanǵan qatań tártip ádisin eldiń ekonomıkalyq tabystarymen aqtaýǵa bolmaıtynyn aıtty.
Osy jerde general Pak Chon Hı týraly aıta ketken jón bolar. Ol 1961 jyly memlekettik tóńkeris jolymen bılikke kelgen. Qatań bılik-ákimshilik basqarý júıesin ornyqtyryp, eldiń ekonomıkasyn kúrt kóterip, búkil álem tanyǵan Koreıa Respýblıkasynyń odan ári damýyna jol ashty dep esepteledi. Bireýler onyń osynaý qatqyl tártibi eldiń álemdegi ornyn bıikke kóterdi dep baǵalasa da, qalyptasqan bılik tártibine halyq qarsylyǵy kúshti boldy. Tipti prezıdent-generaldyń ózine birneshe ret qastandyq ta jasaldy. Aqyry sonyń birinen 1979 jyly qaza tapty.
Qandaı da bolsa, ákeni aıyptaý ońaı emes. Al ol saıası upaı jınaý úshin jasalar bolsa, onsha jarasymdy da is emes. Pak Kyn Heniń partııalastary da, tipti búgingi kúrestegi qarsylastary da onyń bul qadamyn quptap otyr. Al dıktatordyń qurbany bolǵandardyń týystary muny úmitkerdiń shyn nıeti emes, saıası múddesi úshin jasalǵan qadam deıdi.
Al jalpy halyq qalaı baǵalaıdy? Ákesiniń qataldyǵyn aıyptasa, demokrat bolǵany der me eken, joq bılikke jetý úshin ákesiniń árýaǵyna tıisýden de taıynbaıtyn adam ǵoı der me eken, ony aldaǵy prezıdenttik saılaý kórsetedi.
Mamadııar JAQYP, «Egemen Qazaqstan».
