Úkimet basshysy aldymen barǵan «Nur joly» kedendik baqylaý-ótkizý beketi ótken jyly ashylǵan. Bul qurylym tehnıkalyq jabdyqtalý, kólik quraldaryn tekserip, ótkizý jyldamdyǵy jáne baqylaý júıesin engizý boıynsha Qazaqstandaǵy tranzıttik-logıstıkalyq qyzmet kórsetý sapasyn jańa satyǵa kóterdi. Qazir mundaǵy júk kólikterin kedendik jáne shekaralyq rásimdeý ýaqyty 40 mınýtqa deıin qysqaryp, eki baǵytqa 2500 avtokólik bir mezette óte alady. Aldaǵy ýaqytta beket táýligine 5000 kólikke deıin kólik ótkizý múmkingine kóshedi.
Elimizdiń tranzıttik áleýetiniń artýyna úles qosatyn nysandar negizinen «Qorǵas – Shyǵys qaqpasy» arnaıy ekonomıkalyq aımaǵynda ornalasqan. Premer-Mınıstr Asqar Mamın osy aýmaqta bolyp, birneshe nysandy aralap kórdi. Osy jerde Asqar Mamınge jumys istep turǵan ónerkásiptik kásiporyndardyń jumysynyń negizgi kórsetkishteri jáne jańa nysandardyń jobalary tanystyryldy. Qýattylyǵy jylyna 60 000 tonnany quraıtyn «Fenıks Fıd Mılls» qospa jem shyǵaratyn zaýyt bıyl sáýir aıynda paıdalanýǵa engiziledi. 87 jumys orny qurylǵan.
«KIF Warehouses» seriktestiginiń qurǵaq júk saqtaıtyn qoımalarynyń qurylysy aldaǵy sáýir aıynda aıaqtalmaq. Birikken Arab ámirlikterimen áriptestik aıasynda júzege asqan jobanyń jalpy quny 5,1 mlrd teńge. Mundaǵy «A» synypty qoımalardyń 24964 sharshy metri qurǵaq júk saqtaýǵa arnalsa, qalypty temperatýrada jumys isteıtin bóligi 14 516 sharshy metrdi alyp jatyr.
Al «Zarıa LTD» seriktestiginiń júgeri tuqymyn qabyldap, keptirip, saqtaýǵa arnalǵan qoımasyn iske qosýǵa 1,5 mlrd teńge qarajat jumsalǵan eken. Qazirgi kúni alǵashqy jelisi tolyqtaı iske qosylǵan qoıma 15 myń tonnaǵa deıin shıkizat saqtap, syrtqy naryqqa jóneltip otyr. Jaqyn kúnderi elevator kesheniniń ekinshi jelisiniń qurylysy aıaqtalyp, ónim saqtaý kólemi 2 esege deıin kóbeımek. Premer-mınıstr nazaryna usynylaǵan kelesi nysan júk termınaly boldy. Munda kún saıyn 100 tonnaǵa deıin júk jóneltiledi. «Qorǵas – Shyǵys qaqpasy» arnaıy ekonomıkalyq aımaǵyndaǵy júkterdi býyp-túıip, dittegin jerine jóneltýmen osy júk termınaly aınalysýda.
Jaqynda ekonomıkalyq aımaq aýmaǵynda «Qaz Lumiere» saýda ortalyǵy ashylǵan edi. Munda aldaǵy kúnderi otandyq óndirýshiler úshin 15 kún boıynna ótetin saýda jármeńkesi ashylmaqshy. Asqar Mamın saýda ortalyǵynda bolyp, daıyndyq jumystaryn pysyqtady.
Úkimet basshysy Panfılov aýdanyndaǵy Qorǵas ózeniniń jaǵalaýyn bekitý jumysymen de tanysty. «Qazseldenqorǵaý» mekemesiniń tapsyrys berýimen ózen jaǵasyndaǵy qurylyspen «SK-Bazız» kompanııasy aınalysýda. Quny 30 mlrd teńge turatyn joba keler jyly tolyq aıaqtalýy tıis. Qazir uzyndyǵy 6 shaqyrmǵa jýyq damby salynǵan. Basqunshy aýyly men «Dostyq» sý arnasyna deıingi 9 shaqyrymdyq jol jasalyp, Shúkirbulaq sý qomasy men Qazankól ózenine deıingi 17 shaqyrym jaǵalaý bekitilgen.
- «Qorǵas – Shyǵys qaqpasy» arnaıy ekonomıkalyq aımaǵyndaǵy nysandardyń mańyzy zor. Sondyqtan aýmaqty tabıǵat apatynyń saldarynan qorǵaýymyz kerek. Bul baǵyttaǵy jumystar áli de baıaý júrip jatyr. Bólingen qarjynyń 9 mlrd teńgege jýyǵy ǵana ıgerilgen. Iske qarqyn qosý kerek, - dedi Asqar Mamın Panfılov aýdanyndaǵy saparyn qortyndylaı kele.
Premer-Mınıstrdiń Almaty oblysyndaǵy jumys sapary Taldyqorǵan qalasynda jalǵasty. Asqar Mamın oblys ortalyǵynda aldymen at shaldyrǵan nysan – qalalyq kópsalaly aýrýhana boldy. Munda onkologııalyq aýrýlardy erte kezeńde anyqtaıtyn jaǵdaıattyq ortalyq jumys isteıdi. Sońǵy úlgidegi radıologııalyq-aqparattyq keshen qaýipti dertti bastapqy kezeńde anyqtaýǵa múmkindik beredi. Ortalyq jumysy tolyqtaı sıfrlyq júıege kóshken. Qyzmetti ortalyq serverge qosylǵan jasandy ıntellekt atqarady. Ári bul jerge oblystaǵy 13 emdeý mekemesine qoıylǵan seksenge jýyq sıfrly qondyrǵylary tikeleı jalǵanǵan. Iаǵnı, ortalyqtanǵan júıede naýqas boıynda obyr belgileriniń bar-joǵy ońaı anyqtalatyn boldy.
- Ortalyq byltyr jeltoqsan aıynda iske qosyldy. Sodan beri 36 myńnan astam tekserýden ótip, 146 adamda qaterli isik aýrynyń belgileri anyqtaldy. Bul aımaqtaǵy densaýlyq saqtaý salsyn damytýdaǵy ozyq úlgi,- dedi Úkimet basshysyna ortalyq jumysy jaıly túsindirgen oblystyq densaýlyq saqtaý basqarmasynyń basshysy Baýyrjan Ysqaq.
Sondaı-aq, Asqar Mamın qaladaǵy «Taldyqorǵan» ındýstrııaly aımaǵynyń ınfraqurylymymen tanysty. Búginde aımaq boıynsha jalpy kólemi 4192,5 gektardy quraıtyn 6 ındýstrııalyq aımaqty damytý boıynsha jumys júrgizilýde. Oblys ortalyǵyndaǵy arnaıy aýmaqta bıyl eki joba iske qosylady. Onyń biri maıly daqyldardy óńdeıtin «Jetisý Majıko» agrokesheniniń zaýyty bolsa, ekinshisi et ónimderin shyǵaratyn «Lýnıýan Jetisý» zaýyty bolmaq.
Baǵytty damytý boıynsha tıisti tapsyrmalar bergen Premer irgetasy 1975 jyly qalanyp, búgingi kúnge deıin álemdik deńgesde suranysqa ıe ónim shyǵaryp otyrǵan «Qaınar» akkýmýlıator zaýytynda boldy. 1600 adam eńbek etein zaýyt byltyr 2,5 mln dana qýat batereıalaryn jasaǵan. Bul qarjyǵa shaqqanda shamamen 27 mlrd teńge bolady.
Qalada jańadan salynyp jatqan kóp qabatty turǵyn úı men jedel medısınalyq basqarý ortalyǵynyń qurylysyn kózben kórgen keıin Úkimet basshysy kóp balaly analarǵa arnap salynyp jatqan kottejd qalashyǵy aýmaǵyna bardy. Jalpy, bıyl Almaty oblysynda 784 myń sharshy metr baspana paıdalanýǵa beriledi dep kútilýde. Oǵan «Nurly jer» baǵdarlamasy boıynsha 19 mlrd 100 mln teńge qarajat bólingen. Oǵan 42 myń sharshy metr jalǵa beriletin baspana salý kózdelgen. Al 2,8 mlrd teńge qosymsha qarjy kóp balaly otbasylarǵa arnalǵan 8 turǵyn úı salýǵa jumsalmaq.
Taldyqorǵandaǵy jumys sapary barysynda Úkimet basshysy Asqar Mamınge Almaty oblysynyń «Áleýmettik kartasy» tanystyryldy. Onda áleýmettik qorǵaýdy qajet etetin adamdarǵa arnalǵan joba men kóp balaly analardy baspanamen qamtýǵa baılanysty sharalarǵa basymdyq berilgen.
Qalmahanbet MUQAMETQALI,
«Egemen Qazaqstan»
Almaty oblysy
