Týrnırde Qaraǵandy oblysynyń namysyn Shet aýdany Aqjal kentiniń sportshylary qorǵady. Meıir Rahymjan joǵary daıyndyq deńgeıin, mergendigin jáne sabyrlylyǵyn kórsetip, tartysty básekede birinshi oryndy ıelendi.
Jeńimpazdyń aıtýynsha, komanda jarysqa naqty maqsatpen – bar múmkindikti tolyq paıdalanyp, oblys namysyn abyroımen qorǵaý úshin barǵan.
«Jarysqa elimizdiń ár óńirinen myqty sportshylar jınaldy. Qaraǵandy oblysynan tórteý bolyp qatysyp, jeńiske jetýdi maqsat ettik. Qýantatyny – asyq atý búkil respýblıka boıynsha qarqyndy damyp keledi. Bala kúnimizde aýlada asyq oınap júretin edik, al búginde bul – kásibı sport túrine aınaldy. 2022 jyly oblystyq jarysta jeńimpaz atanyp, keıin Qostanaıda ótken respýblıkalyq týrnırge qatysyp, júldeli orynǵa ıe boldym. Osy nátıjelerdiń arqasynda sport sheberligine kandıdat normatıvin oryndadym», dedi Meıir Rahymjan.
Sportshynyń sózinshe, asyq atý dene tózimdiligin, mergendikti, eptilikti jáne jyldam sheshim qabyldaý qabiletin damytady. Oıyn joǵary shoǵyrlanýdy, belsendi qımyldy jáne básekelestik rýhty talap etedi. Sondyqtan bul sport túri qazirgi jastar úshin erekshe tartymdy.
