Selektorlyq rejıminde keńeske Nur-Sultan, Almaty jáne Shymkent qalalarynyń, oblystardyń, aýdan ákimderiniń orynbasarlary, jumyspen qamtýdy úılestirý jáne áleýmettik baǵdarlamalar basqarmalarynyń basshylary, «Azamattarǵa arnalǵan Úkimet» memlekettik korporasııasynyń, Eńbek, áleýmettik qorǵaý jáne kóshi-qon komıtetiniń aýmaqtyq departamentteriniń ókilderi qatysty.
Keńes barysynda aǵymdaǵy jyldyń 1 sáýirinen bastap HQKO, jumyspen qamtý ortalyqtary, aýyldyq okrýgter ákimdikteriniń bazasynda ataýly áleýmettik kómek taǵaıyndaý úshin azamattardyń ótinishterin qabyldaýǵa óńirlerdiń daıyndyǵy máseleleri qaraldy.
«Basty másele - jergilikti jerlerde azamattardyń jańa formattaǵy ataýly áleýmettik kómek alýǵa qujattaryn qabyldaýǵa daıyndyǵyn qamtamasyz etý. Eger qajet bolsa qosymsha mamandardy qarastyryńyz. Sondaı-aq, halyq arasynda sapaly aqparattyq-túsindirý jumystaryn qamtamasyz etý mańyzdy. Azamattarǵa memlekettik qoldaýdyń qandaı sharalary qarastyrylǵanyn qarapaıym túsinikti tilde túsindirý kerek», - dep atap ótti mınıstr.
Aıta ketý kerek, ataýly áleýmettik kómekke ótinish bergen aıdan bastap, ıaǵnı jańa formattaǵy AÁK alý úshin dál 1 sáýirde qujattardy tapsyrý mindetti emes. Muny bir aı ýaqyt aralyǵynda jasaýǵa bolady.
Esterińizge sala keteıik, Elbasynyń tapsyrmasyna sáıkes, Qazaqstanda ú.j. 1 sáýirinen bastap AÁK kórsetý ólshemi eń tómengi kúnkóris deńgeıiniń 50% - dan 70% - ǵa deıin ósip, 20 789 teńgeni qurady. AÁK alýshylar sany 571,6 myń adamnan 830 myń adamǵa deıin ósedi. Bul rette, eger AÁK-tiń ortasha mólsheri otbasynyń árbir múshesine buryn 4 834 teńge quraǵan bolsa, kelesi aıdan bastap, ár balaǵa 20 789 teńge tólenedi.
AÁK alýshylardy qamtýdy keńeıtý maqsatynda otbasynyń jıyntyq tabysy esebinen "Altyn alqa" jáne "Kúmis alqa" belgilerimen marapattalǵan kóp balaly analarǵa, balanyń múgedektigi boıynsha járdemaqy, sondaı-aq, stıpendııalar alynyp tastalady. AÁK taǵaıyndaý rásimi suraý salynǵan qujattardy ońtaılandyrý arqyly jeńildetiledi: tek jeke kýálik qajet bolady.
Sondaı-aq, kóp balaly aýyldyqtar men jastarǵa 505 myń teńge kóleminde jańa bıznes ıdeıalardy iske asyrý úshin 10 myń memlekettik grant beriletin bolady. 5 myńǵa jýyq múmkindigi shekteýli azamattar men kóp balaly analarǵa óz isin ashýǵa 6,5 mln.teńgege deıin shaǵyn nesıeleýmen qamtý josparlanýda.
Turǵyn úı máselelerin sheshý úshin aýqymdy sharalar kesheni qarastyrylǵan, onyń ishinde JTQ úshin jer ýchaskelerin bólý, kóp balaly otbasylar úshin turǵyn úıge bastapqy jarnany sýbsıdııalaý, kóp balaly otbasylar qatarynan az qamtylǵan otbasylar úshin jalǵa beriletin turǵyn úı salý.
Budan basqa, jergilikti atqarýshy organdar kórsetetin áleýmettik qyzmetter men qoldaý sharalarynyń biryńǵaı paketi ázirlendi.
