QR Ulttyq Banki Tóraǵasynyń orynbasary J. Qurmanov habarlaǵandaı, Ulttyq Bank qazaqstandyq qor bırjasynda valıýtaǵa suranys pen usynystyń negizinde qalyptasatyn erkin aıyrbas baǵamy rejımin iske asyrýdy ustanatyn bolady.
«Bul tusta bankter men olardyń klıentteri tarapynan valıýtaǵa suranys usynysynyń ashyqtyǵyn qamtamasyz etý mańyzdy, naryq boljamdy bolýy úshin Ulttyq qor, Ulttyq qordyń qarajaty valıýta naryǵynda qalaı aıyrbastalatyny, kvazımemlekettik sektor kásiporyndary valıýta naryǵyna qalaı shyǵatyny týraly aqparatty ashý úshin memlekettiń belgili bir sharalardy qabyldaǵany mańyzdy», — dedi ol.
J. Qurmanov Ulttyq Bank tarapynan teńge baǵamynyń belgili bir boljamy bolmaıtynyn atap aıtty. Sóz ekonomıkalyq qyzmet sýbektileri tarapynan valıýta naryǵynda suranys pen usynys boıynsha ashyǵyraq aqparatty qamtamasyz etýi týraly bolyp otyr.
Ulttyq Bank tóraǵasy orynbasarynyń aıtýynsha, ınternet-zaımdarǵa qatysty, joǵary paıyzdyq mólsherlememen halyqqa zaım usyný túrinde kórinis beretin tutynýshylyq nesıelendirý salasyndaǵy táýekelderdi tómendetý maqsatynda keshendi jumystar júrgiziletin bolady.
«Biz halyqaralyq tájirıbege taldaý jasap otyrmyz, halyqaralyq tájirıbeni eskerýmen banktik emes nesıe uıymdaryn retteý perımetrin keńeıtý úshin belgili bir usynystardy engizýdi josparlaýdamyz», — dedi J. Qurmanov.
Sonymen qosa, spıkerdiń túsindirýinshe, Ulttyq Bankten Úkimetke jáne kerisinshe retteý fýnksııasyn berý týraly esh áńgime joq. Ulttyq Bank Ulttyq Bank týraly zańǵa sáıkes óziniń retteýshi fýnksııalaryn odan ári iske asyra beretin bolady.
«Biz bul turǵyda da qarjy naryǵyn tolyq retteýge tyrysatyn bolamyz, eger Ulttyq Banktiń rettelmeıtin nesıe uıymdaryna qatysty fýnksııalaryn keńeıtý qajet bolsa, tıisti usynystardy biz ázirleımiz. Ulttyq Banktiń negizgi maqsaty baǵany qamtamasyz etý bolyp tabylady, bul turǵyda Ulttyq Bank tıisti monetarlyq saıasatty paıdalanýmen aqshalaı-nesıe saıasaty aıasynda táýelsiz saıasatyn jalǵastyra beredi», — dep túsindirdi ol.
Ulttyq Bank tóraǵasynyń orynbasary ınflıasııa boıynsha maqsatty dáliz 2021 jyldy qosa alǵanda, oǵan deıin 4-6% aralyǵynda aıqyndalǵanyn jetkizdi.
«Biz ınflıasııaǵa yqpal etetin tıisti syrtqy jáne ishki faktorlarǵa taldaý jasadyq, bul turǵyda biz osy faktorlardy eskerýmen 4-6% aralyǵynda saqtaý durys bolady dep kútip otyrmyz, odan soń ınflıasııa tómendegen jaǵdaıda 3-5% dálizinde qalatyn bolamyz. Inflıasııa máselesi Ulttyq Bankke ǵana qatysty emes, Úkimet tarapyna da qatysty máseleler bar. Osyny eskere otyryp, biz Qazaqstanda ınflıasııany tómendetý boıynsha sharalardy iske asyrýda is-qımyldarymyzdy úılestirý úshin kelisimge qol qoıdyq», — dedi ol.
Budan ózge, J. Qurmanov Ulttyq bank bankterdiń nesıe portfelderiniń sapasyn baǵalaýdy kózdep otyrǵanyn aıtty.
«Táýekelge baǵdarlanǵan qadaǵalaýdyń kóptegen máseleleri bank sektoryna jumyldyrylǵan jáne bank sektory boıynsha óte sezimtal. Bankter aktıvterdiń sapasy, zaımdar portfelderiniń sapasy boıynsha óz máselelerin qalaı sheshedi? Osy úshin halyqaralyq tájirıbeni eskere otyryp, biz bankterdiń nesıe portfelderiniń sapasyn baǵalaýdy josparlap otyrmyz, keıin osy negizde ózimizge tıisti tujyrymdar jasaımyz. Bunyń qorytyndysy boıynsha, nesıe berý uıymynyń táýekeli qanshalyqty joǵary bolsa, retteýshi tarapynan sonshalyqty qadaǵalaý jasalatyn tıisti táýekelge baǵdarlanǵan qadaǵalaý jumystaryn qolǵa alamyz. Atalǵan qaǵıda saqtalady», — dedi ol.
О́z kezeginde, Birinshi vıse-premer – qarjy mınıstri Á. Smaıylov osyndaı rettelmeıtin nesıe uıymdary qazaqstandyqtardyń qarjylyq saýatsyzdyqtaryn paıdalana otyryp, halyqqa úlken paıyzdarmen zaım beretinin atap ótti.
«Olardyń qyzmetin retteý kerek, azamattardyń múddelerin qorǵaý úshin atalǵan marjany shekteý qajet. Osyndaı nesıelik uıymdardy retteýge, shekteýge, paıda tabýǵa múmkindik bermeý úshin Ulttyq bank olarǵa tıisti ýákilettikterdi berýdi usynady, shyn mánisinde, bul azamattardyń nesıelendirýdiń qarjylyq sharttary boıynsha saýatsyzdyqtaryna, az aqparattanýyna jasalǵan aılakerlik shemalary», — dedi Á. Smaıylov.
