Aldymen ǵalym Asqar Jumadildaev esep shyǵarý baıqaýyn otandyq stýdent jastarǵa arnaıy dástúrli túrde on úsh jyl qatarynan ótkizip kele jatqanyn aıta ketken jón.
– Men jastarǵa tapsyrǵan eseptiń birde bireýiniń sheshimin bilmeımin. Sondyqtan ony jastarǵa jasyramyn. Jalpy, eseptiń sheshimin tabýǵa árqalaı ýaqyt ótedi. Jánııa Keńesova bul eseptiń sheshimin bir aptanyń ishinde tapty. Biraq men jeńildeý bolsyn dep tapsyrmany asa qatty qıyndatpadym. Meniń maqsatym – balalardyń izdeniske degen qushtarlyǵyn arttyrý, bul azaıtý amalynyń zańdary ǵoı, barlyǵy qosý amaldaryn kóbirek biledi, azaıtý amalyn eshkim zerttemegen. Sony balalarǵa ádeıi berdim, kórsin dep, úırensin degen nıetpen. Barlyǵy esepti sheshýge on shaqty bala baq synap kórdi, al osy qyzymyzdyń usynǵan sheshimi jańa zańdylyq boldy, besinshi dárejeli tepe teńdiktiń sheshimin tapty, – deıdi akademık.
Akademık sońǵy jyldary jastardyń matematıka ǵylymyna degen ynta-yqylasy azaıyp, qyzyǵýshylyǵy tómendegenine ǵylym janashyry retinde óte qynjylǵanyn aıtady. Sondyqtan jastardy qulshyndyrý úshin osyndaı baıqaý uıymdastyryp, óz esebinen yntaly, talantty stýdentterge arnaıy syılyq taǵaıyndaýdy jón kórgen.
– Bul bastama meniń 50-jyldyq mereıtoıymnan bastalyp ketti, sol kezden beri elimizdiń túkpir-túkpirindegi kásipkerler bastamany qoldap, demeýshilik bildirýge nıet tanytty. Kim jasyrǵan esebimdi shyǵarsa 100 dollar alady, bir jylda shyqpasa, kelesi jyly syıaqy quny 200 dollarǵa ósedi. Jyldan jylǵa syıaqy arta beredi. Ázirshe, meniń jasyrǵan úsh jyldyq esebimdi shyǵarǵan bir shákirtim bar, ol 300 dollarǵa ıe boldy. Al, 100 dollar utqan balalar sońǵy on úsh jyldyń ishinde óte kóp. 50 jyldyq mereıtoıymnan beri, on úsh jyl qatarynan jasyryp kele jatqan esebimde bar, onyń bıyl syıaqy quny 1300 dollar boldy. Ázirshe eshkim shyǵarǵan joq. Ár jyl saıyn esepke 100 dollardan qosylyp otyrady. Bul men usynǵan erekshe noý-haý, – deıdi Asqar Jumadildaev.
Aınash ESALI,
«Egemen Qazaqstan»
ALMATY
