Jaqynda Jarma aýdanynyń ortalyǵy – Qalbataý aýylynda «Uly dalanyń jeti qyry – ulttyq uly qundylyq» atty respýblıkalyq ǵylymı-tájirıbelik konferensııa ótti. Almatydaǵy M.Áýezov atyndaǵy Ádebıet jáne óner ınstıtýty abaıtaný jáne ádebıet tarıhy bóliminiń meńgerýshisi, professor Serikqazy Qorabaı, Semeı qalasyndaǵy Shákárim atyndaǵy memlekettik ýnıversıtetiniń professory, tarıhshy Muhtarbek Kárimov, osy oqý ornyndaǵy aqyndar mektebiniń jetekshisi Aıman Aqtanova syndy ǵalymdar qatysqan jıynda Jarma óńiriniń dańqty tulǵalaryn ulyqtaý jaıy jan-jaqty sóz boldy.
Konferensııany aýdan ákiminiń orynbasary Aıdar Ibraev ashqannan keıin Serikqazy Qorabaı sóz alyp, mazmundy baıandama jasap, sóziniń sońynda birqatar usynystaryn ortaǵa saldy. «Abaı aýdany Qundyzdy aýyly shetindegi Júrekadyr jotasyna jerlengen Aqtamberdi jyraý men Sabyrbaı, Túbek aqyndardyń basyna kúmbezdi keseneler ornatylsa, Úshbıik aýylynda Sybannan shyqqan 17 aqynǵa mýzeı ashylsa, Qalbataýdaǵy kóshelerdiń birine «On jeti aqyn» ataýy berilse, Jarma aýdanynda «Uly babalar izimen» atty ǵylymı-tanymdyq ekspedısııa uıymdastyrylsa deımin. Aqtamberdi jyraý, Aqtaılaq bı, Dýlat, Sabyrbaı, Túbek aqyndarǵa aýdandyq ólketaný mýzeıinen arnaıy buryshtar ashylsa, olardyń óleńderin jatqa aıtýdan oqýshylar arasynda aýdandyq saıys ótkizilse artyq etpes edi.
Jarma óńirinen shyqqan qazaq sırk óneriniń negizin salýshy, «Aǵashaıaq» atanyp ketken áıgili Nazarolla Júndibaıuly atyndaǵy aımaqtyq óner baıqaýy uıymdastyrylsa, búkil Orta júzde báıge bermegen ataqty tulpar Qarashegir shyqqan Kókentoǵaı mekenine belgi qoıylsa ǵıbratty is bolar edi», - deıdi S.Qorabaı.
Azamat QASYM,
«Egemen Qazaqstan»
Shyǵys Qazaqstan oblysy,
Jarma aýdany
