Meıramǵa qatysý úshin 400-den astam otandastarymyz, jergilikti iskerlik jáne qoǵamdyq toptardyń ókilderi Kanadanyń eń iri megapolısinde bas qosty. Is-shara barysynda qazaq halqynyń ulttyq taǵamdary usynylyp, balalarǵa arnalǵan oıyndar men ónerpazdyq tapsyrmalar, sondaı-aq Kanadada turyp jatqan daryndy qazaqstandyqtardyń qatysýymen arnaıy merekelik konsert uıymdastyryldy.
Qazaqstannyń Kanadadaǵy Elshisi Aqylbek Kamaldınov otandastarymyzdy quttyqtaý barysynda Naýryz meıramy ǵasyrlar boıy urpaqtan urpaqqa berilip kele jatqan beıbitshilik pen kelisimniń sımvoly bolyp tabylatynyn atap ótti. «Naýryz bizdiń elimiz úshin úlken mańyzǵa ıe, ol úılesimdilikke, ózara túsinistikke jáne áleýmettik turaqtylyqqa yqpal etedi. Bizdiń basty qundylyǵymyz - halyqtyń birligi. Sondyqtan biz beıbitshilik pen kelisimdi únemi nyǵaıtýǵa tıispiz», - dedi Elshi.
Elshi A.Kamaldınov qazaqstandyq mádenıetti shet elderde belsendi ilgeriletýdi kózdeıtin «Rýhanı jańǵyrý» baǵdarlamasynyń iske asyrylýyna erekshe nazar aýdardy. Osyǵan baılanysty, Islam, parsy jáne Ortalyq Azııa órkenıetteriniń biregeı eksponattary men jınaqtamalaryn usynatyn Torontodaǵy Aǵa-Han mýzeıinde Naýryz merekesin toılaý óte sımvoldy oqıǵa ekeni aıtyldy.
Saltanatty is-sharanyń teń uıymdastyrýshysy bolyp óz úlesin qosqan Qazaqstannyń Ontarıo provınsııasyndaǵy Qurmetti konsýly Sten Bartı de barsha qazaqstandyqtardy Ulystyń uly kúnimen quttyqtady. Ol 20 jyldan artyq ýaqyt boıy elimizdiń qarqyndy damýyn qýanyshpen baqylap otyrǵanyn aıtyp, Kanadanyń ortalyq provınsııasynda Qazaqstannyń atynan jumys jasaý múmkindigine rızashylyǵyn bildirdi.
Meıramnyń júrgizýshisi retinde tanymal kanadalyq jýrnalıst Ben Malronıniń qatysqany qonaqtar úshin tańǵalarlyq jaıt boldy. Ol «Etalk» jáne «Canadian Idol» baǵdarlamalaryna qatysqany, sondaı-aq «Oskar», «Altyn globýs», «Juno Awards» syılyqtaryn tabys etý rásimderin júrgizgeni úshin búkil álemge áıgili.
Meıramǵa qatysqandar is-sharanyń sapaly jáne yqylaspen ótkenin atap ótti.
Is-shara barysynda Qazaqstan Elshisi Torontoda oqyp júrgen qazaqstandyq stýdenttermen bólek kezdesti. Elshi A.Kamaldınov Elshiliktiń jumystary týraly túsindirip, turaqty túrde baılanysta bolý úshin jáne tótenshe jaǵdaılarda kómek kórsetý úshin konsýldyq esepke turý qajettiligin atap ótti. Jastar, óz kezeginde, ózderiniń oı-pikirleri men usynystarymen bólisip, Elshilikpen yntymaqtasýǵa daıyndyǵyn bildirdi.
