Merekelik jıyn shymyldyǵyn Nur-Sultan qalasy Mádenıet jáne sport basqarmasynyń basshysy Bolat Majaǵulov túrip, óner maıtalmandaryn kásibı merekesimen quttyqtady.
– О́ner salalarynyń ishinde teatrdyń orny bólek. Kórermen kóńilin nurǵa, júregin jyrǵa bóleıtin, qoǵamnyń rýhyna dem bolatyn, ishki jan dúnıesine em bolatyn – teatr sahnasy. Elordamyz búginde mádenıet salasy ómiriniń eń negizgi tiregi, ónegeli óner ordasyna aınalyp keledi. Qalamyzdyń mádenı ómirindegi jetken jetistikteri aldymen ónerdegi ózderińizdeı ónegeli jandardyń eseli eńbegi men jalyndy jigeriniń jemisi ekeni daýsyz. Salmaǵy men sybaǵasy aýyr óner joly myzǵymas maqsat pen tabandy talap qoıa biletin tańdaýlylarǵa ǵana tıesili baqyt. Teatrdyń tuǵyryn qataıtyp, bedelin bekem etýdegi eńbekterińiz ushan-teńiz. Olaı bolsa, aldaǵy ýaqyttarda da kórermenniń kóńil shýaǵyn tyń týyndylarmen toltyryp, ónerlerińiz ben kúsh-jigerlerińizdi elordamyzdyń rýhanııatyn baıytý jolyna arnaıtyndaryńyzǵa kámil senemin» – dedi Bolat Baýyrjanuly óziniń quttyqtaý sózinde.
Aıtýly shara astanalyq akterler men rejısserlerdiń qyzyl kilemnen ótý saltanatymen bastalyp, sońy Halyqaralyq teatr kúnine arnalǵan merekelik keshke ulasty. Jalpy, elordalyq teatr ujymdarynyń kásibı meıramyn toılaý dástúri erekshe. Merekelik is-sharaǵa jaýapty teatrlar jyl buryn aldyn ala arnaıy tańdalyp alynyp, bekitilgen óner oshaǵy kezegimen estafeta boıynsha saltanatty keshti uıymdastyrý múmkindigine ıe bolady. Bıyl ol jaýapkershilik bas qalamyzdyń eń jas óner ordasy – Komedııa teatryna júktelipti. Jalyndy jastardyń uıymdastyrýymen ótken keshten jastyq pen jańashyldyqtyń lebi aıqyn seziledi. Qyzyqty ázil, kásibı taqyrypty qaýzaıtyn kóńildi qoıylymdar keshke jınalǵan óner maıtalmandary men kórermenderge kóterińki kóńil kúı syılap, merekelik úlken tartý bolǵany anyq. Sondaı-aq saltanatty konsertte Komedııa teatry akterlerinen bólek, Nur-Sultan qalasynyń ózge de teatrlarynyń, atap aıtsaq, Q.Qýanyshbaev atyndaǵy Qazaq mýzykalyq drama teatry, Jastar teatry, M.Gorkıı atyndaǵy akademııalyq orys drama teatry, «Naz» bı teatry jáne Qýyrshaq teatry ujymdarynyń daıyndaýymen 5-7 mınýttyq merekelik kórinis kórsetilip, jyl boıy jumysynda úzdik nátıje kórsetken teatr ártisteri men jalpy sahna salasy qyzmetkerleri Nur-Sultan qalasy ákimi Baqyt Sultanovtyń atynan arnaıy alǵys hatpen marapattaldy.
Iá, teatr – tektilik mekeni, has sulýdyń kóz jasyndaı móldir óner. Búgingi kún jaı ǵana Halyqaralyq teatr kúni emes, myna álemde jany kirlep, rýhanı shólirkegen pendeniń jany saıa tabar ortaq qundylyǵynyń, Melpomenanyń merekesi. Osy amanatqa bar ómirin arnap, adal qyzmet etip kele jatqan sahna maıtalmandary kórermenine búgin de sol qaıtalanbas óner qýanyshyn tartý etti.
Nazerke JUMABAI,
«Egemen Qazaqstan»
