Jyl basynan beri oblysta demeýshilerdiń kómegimen 782 otbasyǵa jalpy mólsheri 44,7 mıllıon teńgege túrli kómekter kórsetilipti. «Aqtóbe qalasynda «Qolǵanat Aqtóbe» qoǵamdyq qoryna habarlasqan kásipkerler 6 kópbalaly, áleýmettik jaǵynan az qorǵalǵan jandarǵa páter alyp berdi» - dep habarlaıdy Aqtóbe qalasy ákimdigi baspasóz qyzmetiniń jetekshisi Gúlshat Seraly.
Demeýshilerdiń osyndaı sharapatyn sezingenderdiń biri — 8 balanyń anasy Saltanat Sádýova. Jaqynda Saltanatqa aqtóbelik kásipker, «AqtóbeStroıEkspert» JShS dırektory Jastalap Janbaýov «Nur Aqtóbe» shaǵyn aýdanynda bir bólmeli páterdiń kiltin tabystady.
Buǵan deıin Aqtóbe qalasyndaǵy Qulymbetov kóshesi boıyndaǵy záýlim úıdiń aýlasyndaǵy aıadaı ǵana bólmeleri bar ýaqytsha baspanada kúneltip otyrǵan Sádýovter otbasy kútpegen jerden qýanyshqa tap boldy. Segiz balany ómirge ákelgen Saltanat Sádýova — búginde úsh múgedek jandy baǵyp otyrǵan ana. Basynda baspanasy joq ana osydan tórt jyl buryn Áıteke bı aýdanynyń Sarat aýylynan qonys aýdarǵan. Ondaǵy maqsaty — otbasyndaǵy múmkindigi shekteýli jandardy qaladaǵy medısınalyq ońaltý ortalyqtaryna jıi-jıi aparyp, balalaryn arnaıy mektepte oqytý.
Saltanattyń baspana kezeginde turǵanyna 4 jyl bolypty.
— Jasym — 47-de. Bir otbasynda 3 múmkindigi shekteýli jan baqqan adamnyń qasiretin eshbir adamnyń basyna bermesin. Segiz balam bar. Joldasym ekinshi top múgedegi, jumysqa jaramsyz. Eki balam da — múgedek, arnaıy mektepte oqıdy. Men úshin basty problema — baspana bolatyn. Osy máselemen talaı jerge bardym, Astanaǵa da hat joldaǵan edim. Endi otbasymmen jańa baspanada turyp jatqan jaıym bar.— dedi «Altyn alqa» ıegeri.
Jańa páterli bolǵan Saltanat qýanyshtan kóz jasyna erik berip, qıyn jaǵdaıda otbasyna kómek qolyn sozǵan kásipkerge alǵysyn jaýdyrdy.
— Bul otbasynyń turmystyq jaǵdaıynyń aýyr ekenin túsinip, óz tarapymyzdan qoldaý kórsetýge tyrystyq. О́zim de kóp balanyń ákesimin, onyń ústine kópbalaly otbasynan shyqqanmyn. Ata-babamyz tarıhta qýǵynǵa ushyraǵan ózge ult ókilderin de óz baýyryna tartyp, ash otyrsa da bir tilim nanyn úzip bergen emes pe?! Búgingideı el aman, jurt tynysh zamanda ózimiz sııaqty kásipkerler, er-azamattary osyndaı muqtaj jandarǵa nege kómektespeske?! Muny ózimdi jarnama retinde emes, qalyptasqan jaǵdaıǵa baılanysty isker azamattarǵa oı salý retinde jasalyp otyrǵan shara dep túsinińizder, — dedi Jastalap Janbaýov.
Araılym NURBAEVA
AQTО́BE
