Jańa sheshim TMD Ekonomıkalyq keńesiniń janyndaǵy Ekonomıkalyq máseleler jónindegi komıssııanyń otyrysynda qabyldandy.
TMD qatysýshy memleketteriniń seısmıkaǵa tózimdi qurylys salasyndaǵy Bazalyq uıym TMD elderindegi ǵylymı-zertteý ınstıtýttarynyń tıimdi yntymaqtastyǵy jáne tájirıbe almasýy úshin biryńǵaı platformaǵa aınalady dep josparlanyp otyr.
Bazalyq uıym qyzmetiniń sheńberinde TMD qatysýshy memleketter elderiniń tanymal, qazirgi ǵalymdary men mamandary arasynan ǵylymı keńes qurý, sonymen birge ǵımarattar men qurylystardyń seısmıkaǵa tózimdiligin qamtamasyz etý máselelerin sheshýge jas ǵalymdardy belsendi tartý josparlanyp otyr. Sondaı-aq TMD normalaryn úılestirý máseleleri boıynsha jumys tobyn qurý jáne seısmıkaǵa tózimdi qurylys salasynda biryńǵaı aqparattyq baza qalyptastyrý kózdelgen.
«QazQSǴZI» AQ bas dırektory Begman Kýlbaev TMD Ekonomıkalyq keńesiniń janyndaǵy Ekonomıkalyq máseleler jónindegi komıssııa otyrysyndaǵy baıandamasynda: «Seısmıkalyq qaýipti aýmaqtardaǵy qurylys kezinde qajetti qaýipsizdik deńgeıin qamtamasyz etý, TMD qatysýshy memleketteriniń aýmaǵyn jalpy seısmıkalyq shaǵyn aımaqtandyrý kartasyn ázirleý, kúrdeli ınjenerlik-geologııalyq jaǵdaılarda ár túrli konstrýktıvtik sheshimderdiń tózimdiligine taldaý júrgizý, sondaı-aq tıimdi seısmıkalyq oqshaýlaý ádisterin jasap shyǵarý úshin jaǵdaılar men tıimdi mehanızmderdi tek birikken kúsh arqyly ǵana qurýǵa bolady», – dep atap ótti.
Bazalyq uıym týraly joba buǵan deıin TMD elderiniń qurylys qyzmetindegi yntymaqtastyq jónindegi Úkimetaralyq keńestiń otyrysynda qarastyrylyp, maquldanǵanyn eske salamyz.
Aınash ESALI,
«Egemen Qazaqstan»
ALMATY
