Avtordyń balalyq shaǵynan qalyptasqan tanym-túsinigi men qorshaǵan orta týraly qııal kókjıegi kórinis tapqan «Meniń balalyq shaǵymnyń aýyly», «Beldesý», «Kerýen», «Oıyn» syndy týyndylary kórme tórinen oryn teýipti. Qulpyrǵan óń men mazmunǵa baı kompozısııasy avtordyń ózindik qoltańbasyn birden daralaıdy. Jarasymdy jolaqtar kókten tik quıylǵan qalpy munartqan atyrap kórgen tústeı bulyńǵyrlana kele, kenet jarq etip baryp, ishki syryn qaz-qalpynda aldyńa jaıyp salady.
Talant tasty da jaryp shyǵady. Beıneleý ónerine múldem tosynnan kelgen A.Qazyǵulovtyń ónerin ústem etip, mereıin asyrǵan tabandy eńbegi men tógilgen teri. Onyń Abaı atyndaǵy Qazaq pedagogıka ınstıtýtynyń kórkemsýret-grafıka fakýltetine aıaqasty oqýǵa túsip ári úzdik aıaqtaýy tańǵalarlyq dúnıe.
– Jylyna júzdegen kartına jazamyn, biraq sonyń arasynda kóńilimnen shyǵatyny az. Adamdy alyp shyǵatyn da, tanytatyn da izdenis pen eńbek, – deıdi sýretshiniń ózi. Áıgili jazýshy Shyńǵys Aıtmatovty da osy bir shynshyl, tuńǵıyq +bolmysymen baýrap alsa kerek. «Qazaqtyń darqan dalasyna, týǵan eline, Jer-Anaǵa degen súıispenshilik seziletin Alpysbaıdyń sýretteri meni birden baýrap aldy. Sýretshiniń qylqalamynan týǵan dúnıelerde jalǵandyq joq», degen jazýshy avtordyń máńgilik taqyryptarǵa taısalmaı boılaıtynyna tańdanys bildiredi.
Alpysbaı Qazyǵulov qyryq jyldyq shyǵarmashylyq ǵumyrynda 7 myńnan astam týyndy jazǵan daryndy sýretker. Shyǵarmalarynyń bas keıipkeri – aspan men jerdi astastyrǵan ulan-ǵaıyr keńistik. Týyndylary Á.Qasteev atyndaǵy Memlekettik óner mýzeıinde, elimizdiń bas rezıdensııasy Aqordada, ózge de kórkemsýret mýzeıleri men shetelderdegi derbes kolleksııalar qorynan oryn alǵan. Sondaı-aq Chehııanyń birinshi prezıdenti Masarık atyndaǵy halyqaralyq syılyqtyń ıegeri (2003 j., Praga).
Aıa О́MIRTAI,
«Egemen Qazaqstan»
