Nursultan Nazarbaev Shamalǵan aýylyndaǵy Qazaqstan Respýblıkasynyń Tuńǵysh Prezıdenti – Elbasynyń «Atameken» tarıhı-mádenı ortalyǵynda jergilikti turǵyndarmen kezdesti. Týǵan jerine táý etýge kelgen Elbasymen kezdesýge 3 myńnan astam adam jınaldy.
- О́ziniń týǵan aýylyn jaqsy kórmegen adam Otanyn súıe almaıdy. Uly elge degen mahabbat kishkentaı eldi mekendi qadirleýden bastalady. Men qyryq jyl qalada qyzmet etsem de týǵan topyraǵymdy esimnen shyǵarǵan emespin. Qıyn-qystaý kezeńde, Táýelsizdikti saqtap qalý úshin túrli táýekeldi joldan ótkende kishi Otanymnyń topyraǵy janyma qýat berip, jigerlendirip otyrdy. Týǵan jerdi súıý arqyly álemge qazaq degen halyqtyń bar ekenin, el ekenin tanytyp, Uly Otanymyzdyń abyroıyn asqaqtattyq. 170 eldi aralap, eki júzden astam basqa eldiń prezıdentterimen kezdestim. Bir adam úshin bul orasan baqyt. Búgin sizderdiń aldaryńyzǵa osy aýyldyń topyraǵynda ósken baladaı bolyp kelip turmyn. Árıne, aýyl ózgergen, zaman ozǵan. Bizdiń qıyn da qyzyqty balalyq shaǵymyzdyń belgisin qazir tabý qıyn. Qurdastarym da saýsaqpen sanarlyq. Búgin múldem basqa urpaqty kórip turmyn. Olar baqytty, jańa zamannyń ókilderi. Osy urpaǵymyzdyń damyǵan elde turý úshin az eńbektenbedik. Qazir elimizdi álem moıyndady. Balalarymyz shetelde bilim alýda, aýylda turyp ozyq tehnologııaǵa qol jetkizdik. Osynyń bári elimizdegi beıbitshiliktiń, qazaqtyń birliginiń arqasy. Osy bereke-birlikti qalpymyzben alǵa qadam basyp, órkendeı berýimiz kerek, - dedi Nursultan Nazarbaev halyqpen kezdesýde.
Elbasynyń kindik qany tamǵan aýyldaǵy «Atameken» tarıhı-mádenı ortalyǵy Nursultan Nazarbaevtyń Memleket Basshysy retindegi órnekti ómir jolynan syr shertip qana qoımaı, tutas elimizdiń Táýelsizdik tarıhynan mol maǵlumat beretin nysan. Qazir munda kelýshiler qatary kóbeıgen. 22 000 adam qonystanǵan Shamalǵan kentiniń turǵyndary úshin «Atameken» ortalyǵy ólke men óńir shejiresiniń kıeli shańyraǵy ispetti bolsa, syrt óńirden arnaıy kelip, bas suǵatyn adamdar úshin táý eter tarıhı orynǵa aınalyp otyr.
Elbasy Nursultan Nazarbaev Qarasaı aýdanyna sapary aıasynda Shamalǵan kentinde jańadan salynyp jatqan dene shynyqtyrý jáne saýyqtyrý kesheniniń qurylys barysymen tanysty. Dene shynyqtyrý-saýyqtyrý kesheniniń aýmaǵy 7300 sharshy metr eken. Nysan 6 bloktan turady. Voleıbol, basketbol, gandbol jáne mınıfýtbolǵa arnalǵan ámbebap zalda jarys tamashalaý úshin 300 oryndyq jeke trıbýna bolady. Shyǵys jekpe-jegi, boks, kúres sııaqty sport túrlerine arnalǵan jattyǵý zalyna japsarlas 160 adamdyq kórermen zaly bólek salynýda. Júzý basseınine de suranys kóp bolatyn túri bar. Bul keshen bir mezgilde 300 adamnyń sportpen shuǵyldanýyna múmkindik bermek. Aıtpaqshy, buqaralyq sportty damytýǵa arnalǵan keshenniń qurylysy Elbasynyń tikeleı qoldaýymen jáne onyń jeke qarajatyna salynýda.
Elbasy Nursultan Nazarbaev Shamalǵan aýylynda birge oqyǵan synyptastarymen jáne bala kezdegi dostarymen kezdesip, áńgimelesti. Áńgimelesý barysynda ejelgi dostar ózderiniń estelikterin bólisip, óńirdiń qazirgi damý jaǵdaıyn talqylady.
