Elordada ınklıýzıvti spartakıada ótti

Shara Dúnıejúzilik aýtızm týraly aqparatty taratý kúnine oraılastyryldy. «Bizdiń birlestik 2016 jyly quryldy. Biz kınoteatrlar, sporttyq alańdar, mýzeıler balalarymyzǵa qoljetimdi bolýy úshin biriktik. 2017 jyly biz qalalyq ákimdikpen birlesip, aýtızmi bar balalardy áleýmettendirý boıynsha áleýmettik jobany bastaǵan bolatynbyz.  Qazirgi tańda bizdiń eki jobamyzda 220 bala bar», – dedi «Orda» aýtızmi bar balalar ata-analary qoǵamdyq birlestiginiń tóraǵasy Saltanat Esmaǵambetova. 

Spartakıadaǵa júzden astam bala qatysty. Sondaı balanyń anasy Gúlsim Symbatovanyń aıtýynsha, ınklıýzıvti jarys múmkindigi shekteýli balalarǵa ózderiniń qurdastarymen qarym-qatynas jasaýǵa múmkindik beredi. «Yntymaqtastyq tájirıbesi balalardyń janashyrlyqqa, meıirimdilikke, túsinistikke jetýine yqpal etedi. Bolashaqta mundaı balalar meıirimdi bolady. Mundaı jaǵdaılarda erekshe balalar ózara árekettesýdi úırenedi, sondyqtan da osyndaı sharalar olar úshin óte mańyzdy », – dedi ol. 

Erekshe balanyń anasy Zarına Dandybaevanyń aıtýynsha, memleket mundaı balalarǵa jan-jaqty kómek kórsetýde. «Orda» ortalyǵynda biz ońaltýdan tegin ótemiz. Biz sportpen shuǵyldanamyz, logoped, patolog, psıholog mamandarymen keńesemiz. Bizdiń balalarymyz mýzyka terapııasy, oıyn terapııasy sııaqty toptyq sabaqtarǵa qatysady. Bizdi aptasyna bir ret mýltfılmderdi kórýge kınoteatrǵa shaqyrady»,  – dedi Zarına Dandybaeva.