Pioneer Concept Qoǵamdyq qory men InfoJump sporttyq marketıng agenttigi bastamashyl bolǵan mádenı is-sharaǵa «Nur Otan» partııasy Almaty qalalyq fılıaly men qalalyq ákimdik qoldaý kórsetti.
«Maqsat – aýtızm dertine shaldyqqan balalarǵa shýaqty meıirim men qýanysh syılaý arqyly osy jabyq taqyrypqa qoǵamnyń nazaryn aýdarý», - dedi jıyndy ashqan Pioneer Concept QQ dırektory Janat Qarataı.
Búginde aýtızm álemdik deńgeıdegi máselege aınalǵan. Sondyqtan, 2007 jyly 18 jeltoqsanda Birikken Ulttar Uıymynyń Bas Assambleıasynda arnaıy qaralyp, nátıjesinde 2008 jyldan bastap, 2 sáýir aýtızm týraly aqparat taratý kúni bolyp jarııalandy.
Shynyn aıtqanda, aýtızm Qazaqstanda kóp aıtyla bermeıdi. Statıstıka boıynsha, elimizde 4 myńdaı bala osy dertpen esepke alynǵan. Dıagnozy erte anyqtalsa, ondaı balany mektepke deıin ońaltý múmkindigi bar ekenin medısına dáleldep otyr.
Sonymen qatar, aýtızmmen týǵan sábıler dári-dármekpen ǵana emdelmeıtinin kóp adam bile bermeıdi. Olardy saýyqtyrý, beıimdeý úshin úlken psıhologııalyq kómek kerek. Sol sebepti, Nur Otan partııasy men memleket túrli baǵdarlamalar qabyldap, úkimettik emes uıymdarmen birlese jumys istep keledi. Atap aıtqanda, Elbasymyzdyń tapsyrmasy boıynsha, partııalyq «Kedergisiz keleshek» jobasy engizilip, ınklıýzıvti bilim berý, múgedekterdi eńbekke ornalastyrý sııaqty sharalar turaqty júzege asyrylýda.
«Osy joba aıasynda 2015 jyldan beri qalamyzda erekshe qajettiligi bar jandarǵa bólinetin qarjy kólemi 2,4 mlrd. teńgeden 4,2 mlrd. teńgege (ıaǵnı 2 esege) artty. Tek, ótken jyldyń ózinde 1 myńnan astam múgedek jandar jumysqa ornalastyryldy. Basqa da ataýly kómekter turaqty kórsetilýde, - dedi óz sózinde Nur Otan partııasy AQF tóraǵasynyń birinshi orynbasary Stanıslav Kankýrov.
Sondaı-aq, Almaty, Nur-Sultan, Qyzylorda, О́skemen qalalarynda bıznes kómegimen aýtızmnen ońaltý ortalyqtary qurylyp, balalardyń sportpen, mýzykamen aınalysýyna múmkindikter jasalyp otyr. Nátıjesinde «Aýtızmdi jeńemiz» jobasy paıda bolyp, jas balalardyń ómir súrýge degen qulshynysyn oıatty. Kishkentaı uldar men qyzdar qandaı qıyndyq bolsa da, ony jeńýge bolatynyn dáleldedi. Jas bıshiler, ánshiler óz ónerlerin ortaǵa salyp, jınalǵan kópshiliktiń ystyq yqylasyna bólendi.
Búgingi aksııa sonyń jarqyn jalǵasy dep bilemiz.
Saparbaı PARMANQUL,
«Egemen Qazaqstan»
ALMATY
