Prezıdenttiń alǵashqy sapary Reseı BAQ-tarynda qalaı kórinis tapty

Memleket basshysy Qasym-Jomart Toqaevtyń Máskeýge jasaǵan resmı sapary ha­lyq­aralyq qoǵamdastyq­tyń na­za­ryn aýdarǵan saıası oqı­ǵa­lardyń biri bolǵany anyq. Osy oraıda otandyq, shetel­dik, olardyń ishinde, ásirese reseılik buqaralyq aqparat quraldary kóptegen habar taratty, sondaı-aq sapardyń mán-mańyzyn ashyp kórsete otyryp, ózara baılanystardyń búgini men bolashaǵy týraly oı-tolǵamdar men pikirlerdi keńinen jarııalady.

Reseıdiń yqpaldy ári je­tekshi buqaralyq aqparat quraldary Memleket basshysy Q.Toqaevtyń Máskeýge resmı sapary Qazaqstan-Reseı qatynastary­na tyń serpin beretinin jarysa jazdy. Sondaı-aq olar Qasym-Jomart Toqaevtyń Prezıdent retinde shetelderge saparlaryn aldymen Reseıden bastaǵanyna mańyz berdi. 

Sonymen qatar reseılik BAQ-tar Qazaqstannyń kóp­vektorly saıasat ustanyp, Batys pen Shyǵystyń ara­synda «altyn kópir», senimdi, teń dáre­jeli seriktes memleket retinde tanyl­ǵanyna, elimizdiń osy baǵytyn halyq­ara­lyq qoǵam­dastyq udaıy qoldap kele jat­qanyna, Qazaqstan men Reseı­diń jaı ǵana kórshiles elder ǵana emes, barlyq sala­lar boıynsha, ásirese saıası-eko­no­mı­kalyq turǵyda senimdi serik­tes bola bil­genine, sondaı-aq Nur-Sultan qalasynyń álemdik jáne aımaqtyq qaýipsizdikti nyǵaıtýdaǵy róline basa nazar aýdarǵan.

Tarqata aıtar bolsaq, «RIA Novostı» agenttigi Qazaqstan Prezıdenti men Reseı basshysynyń kelissózderi Nursultan Nazarbaev qalyptastyrǵan dástúrge saı ótkenin aıta kelip, V.Pýtınniń: «Biz Qazaqstan Prezıdentine óziniń sheteldik birinshi resmı saparyn bizdiń elge, Reseıge jasaǵanyna rızashylyǵymyzdy bildiremiz. Túrli memlekettik laýazymdarda qyzmet etken Qasym-Jomart Toqaev myrza buǵan deıin reseılik áriptesteri­men tyǵyz baılanysta bolǵandyqtan, Prezıdent retinde de bizdiń elderimiz arasyndaǵy ózara tıimdi yntymaqtastyq pen odaqtastyq qatynastardy odan ári damytýǵa únemi nazar aýdaratynyna kúmán joq», degen sózine ekpin bergen.

Atalǵan aqparat agenttigi Qazaqstan Prezı­denti Q.Toqaev­tyń eki el arasyn­daǵy dos­tyq qarym-qatynastar­dy jal­ǵas­­tyrý óziniń mindeti ekenin aıt­qany­na nazar aýdarǵan. Osy oraıda agenttik Qazaqstan basshysynyń: «Bizdiń qarym-qatynasymyz únemi damyp keledi. Meniń mindetim – osy strategııalyq baılanystyń úzdiksiz jalǵasýyn qamtamasyz etý. Men bizdiń halyqtarymyzdyń dostyq áleýetin nyǵaıtý úshin bar kúsh-jigerimdi salamyn», degen sózin keltiredi. Sondaı-aq «RIA Novostı» Reseı Prezıdenti Vladımır Pýtın men onyń qazaqstandyq áriptesi Qasym-Jomart Toqaev «Astana prosesi» aıasynda Sırııadaǵy qaqty­ǵysty sheshý jónindegi kúsh-jigerdi jalǵastyrýǵa keliskenin jazdy. 

«Rossııskaıa gazeta» (RG.RU) portaly Qazaqstan Prezıdenti Qasym-Jomart Toqaevtyń Reseı Prezıdenti Vladımır Pýtınmen burynnan tanys ekenderin aıta kelip, memleketter basshylarynyń bir-birine aıtqan jyly lebizderine toqtalǵan. Osy oraıda RG.RU portaly V.Pýtınniń: «Siz bizdiń qarym-qatynastarymyzdyń deńgeıin bilesiz. Siz Reseı men Qazaqstan arasyndaǵy baılanystar­dy osy deńgeıge kóterý úshin kóp qyzmet atqardyńyz. Árıne, bul máselede eń aldymen Qazaqstannyń Tuńǵysh Prezıdentiniń eńbegi aıryqsha. Biz ózara yntymaq­tastyǵymyzdy nyǵaıtý maqsatynda jumys istedik, nátıjesinde kóp jetistikke jettik», dep qazaqstandyq áriptesine aıtqan sózine toqtalǵan.

Sonymen birge RG.RU portaly Reseı basshy­sy­nyń: «Biz jaı ǵana seriktes emespiz, biz eń jaqyn odaqtaspyz», degen sózine mán bere otyryp, V.Pýtınniń memleketter arasyndaǵy qarym-qaty­nas­tar halyqaralyq uıymdar aıasynda da, ekijaqty baılanystarda da tıimdi damyp kele jatqany, bul óz kezeginde eki memleket halyqtarynyń ómir súrý deńgeıine oń áser etetin eleýli nátıjelerge qol jetkizýge jol ashatyny týraly pikirin jetkizgen. Sondaı-aq atalǵan portal Q.Toqaevtyń ózara yntymaqtastyqty odan ári nyǵaıtý úshin barlyq múmkindikti jasaýǵa kúsh-jigerin aıamaıtyny jóninde aıtqanyn keltirgen. Buǵan qosa, «Rossııskaıa gazeta» Q.Toqaevtyń «1992 jylǵy shartty daıyndaýǵa qatysqanym esimde, osy kelisim negizinde bizdiń elderimiz odaqtastyq qatynastarǵa múmkindik aldy. Biz odaqtastyq qarym-qatynastar jáne olardan týyndaıtyn mindettemeler týraly jaqsy bilemiz», degen sózin jarııalady.

Al «Moskovskıı Komsomoles» («MK.ru»): «Qasym-Jomart Toqaev pen Vladı­mır Pýtın bir-biri­men tanysý úshin ýaqyt jumsamady. Sarapshylar Qazaq­stannyń jańa Prezıdentiniń Máskeýge jasaǵan sapary barynsha sypaıy ótetinin aıtqanymen, prezıdentter ózderiniń jaýyn­ger­lik-kóshbasshylyq rýhyn kórsetti jáne ynty­maq­­tas­tyqty jalǵastyrýǵa baǵyttalǵan bir­qatar keli­simderge qol qoıdy. Qasym-Jomart Toqaev­tyń Qazaqstan Prezıdenti retinde Máskeýge sapar jasaý úshin daıyndalýǵa eki apta ǵana ýaqyt ketti. Ol ant qabyldaǵan kúni Kremlden shaqyrý aldy. Aqor­da birden kelisti. Bul kópvektorly saıasat usta­na­tyn Qazaqstan Reseıdiń aldaǵy ýaqytta basty serik­tesi ári odaqtasy bolyp qala beretinin kórse­tedi.

Vladımır Pýtın Qazaqstan Prezıdenti Qasym-Jomart Toqaevty Kremldiń úlken saraıynda qabyl­dady. Bul format ádette eń qurmetti qonaqtar úshin qoldanylady.

Prezıdentter bir-birimen arnaıy tanysýdy qajet etpedi. Olar alǵash ret 2000 jyly tanysqan. Sodan beri olar túrli alańdarda birneshe ret kezdesken», dep jazdy.

Sonymen qatar reseılik basqa da buqaralyq aqparat quraldary eki el arasyndaǵy strategııalyq áriptestikti jan-jaqty nyǵaıtýǵa degen ortaq nıettiń bar ekenin, Qazaqstan men Reseı túrli salalar boıynsha ózara is-qımyl jasaýda mol tájirıbe jınaqtaǵanyn, taraptar úshin mańyzy zor ekijaqty baılanystardyń quqyqtyq bazasyn quraıtyn memleketaralyq jáne úkimetaralyq 450-den astam qujat qabyldanǵanyn, olardyń ekijaqty yntymaqtastyqtyń bolashaǵyna senimmen qaraýǵa, barlyq baǵyttardaǵy áriptestikti keńeıtýge múmkindik beretinin, Qazaqstanda jumys isteıtin 9 myńnan astam birlesken kásiporyn aradaǵy saýda-ekonomıkalyq baılanystarǵa zor úlesin qosyp otyrǵanyn atap kórsetti. Sonymen birge reseılik BAQ Prezıdent Qasym-Jomart Toqaevtyń Qazaqstan-Reseı baılanystaryn óristete túsýge kúsh salatyny jóninde aıtqan sózin jarysa jarııa­la­dy.