- О́ńirimizge ınvestısııa tartý – bizdiń jumysymyzdyń basym baǵyty bolyp tabylady. Oblysymyz úshin barlyq ınvestısııalyq joba mańyzdy. Olar «qarapaıym zattar ekonomıkasynyń» damýyna baǵyttalady. Memleket basshysy Qasym-Jomart Toqaev atap ótkendeı, ındýstrııalandyrý men ınvestısııalar – ekonomıkanyń negizgi qozǵaýshy kúshi. Sondaı-aq Prezıdent memlekettik organdar men bıznes qaýymdastyǵynyń sabaqtasa jumys jasaýy qajettiligine erekshe ekpin qoıdy. Biz sizder úshin jumys jasaýdamyz, - dedi oblys ákimi óńirde túrli jobalardy júzege asyrýshy ınvestorlarǵa qarata.
Aıta keteıik, qazirgi tańda Batys Qazaqstan oblysynda bordaqylaý alańdary qurylysy boıynsha jalpy quny 6 mlrd. teńge bolatyn 4 joba, jylyjaı kesheni qurylysy boıynsha 17,5 mlrd teńgeni quraıtyn 2 joba, 20 mlrd teńgelik turǵyn úıler qurylysy jobasy, 4 mlrd teńgege baǵalanǵan sút ónimderin óndiretin keshen, 4 mlrd teńge turatyn transformatorlarǵa arnalǵan radıatorlar óndirý jobasy, kirpish zaýyty jáne t.b. ınvestısııalyq jobalar júzege asyrylýda. «KAZAKH INVEST» AQ UK Basqarma tóraǵasynyń keńesshisi Marat Esenov jıynǵa qatysýshylardy atalǵan jobalardy qoldaıtynyna sendirip, ulttyq kompanııa tarapynan barlyq kómek beriletinin aıtty. Kezdesýge sondaı-aq «Atameken» UKP, «Damý», «Kásipkerlikti qoldaý qory», t.b. ókilderi de qatysyp, óńirdegi jobalardy qarjylaı qoldaý joldaryn ortaǵa saldy.
Altaı Kólginovtiń aıtýynsha, «qarapaıym ekonomıka zattary baǵdarlamasynyń oryndalýy jáne ınvestısııalyq klımatty jaqsartý máselesi árdaıym kún tártibinen túspeıdi».
Keleshekte iske qosylyp, óńir ekonomıkasyn kóteredi dep josparlanǵan keıbir iri jobalarǵa toqtala keteıik: «Et ındýstrııasy» («Mıasnaıa Indýstrııa») JShS qolǵa alǵan bordaqylaý alańynda bir mezgilde 5 myń bas mal semirtilmek. Joba quny – 2,5 mlrd teńge. Al «Ringo-Milk» JShS 4 mlrd teńgege jylyna 7 myń tonna ónim shyǵaratyn sút keshenin salyp jatyr. «Oral jylyjaı kombınaty» («Ýralskıı teplıchnyı kombınat») JShS 7 mlrd teńgege jylyjaı kesheni qurylysyn bastaǵan. Al Báıterek aýdanynda qııar men qyzanaq ósiretin jylyjaı keshenin «World Green Company» JShS qolǵa alypty. Bul jobanyń quny – 14 mlrd teńge. Sondaı-aq «K7 GROUP» kompanııasy turǵyzatyn turǵyn úıler kesheni 20 mlrd teńgege baǵalanyp otyr. Terekti aýdanynda 3 myń bas iri qara bordaqylaıtyn alańdy «Syrym KZ» sharýa qojalyǵy salmaq. Buǵan da 1 mlrd teńge kóleminde ınvestısııa kerek. Al búginge deıin elimizde ǵana emes, shetelderge tanymal bolǵan Oral transformator zaýyty jańadan iske qosqaly otyrǵan radıator zaýyty da óńirge 4 mlrd teńge ınvestısııa tartypty. Bul jobalarǵa jeke toqtalyp, áleýmettik jelidegi jeke paraǵyna jarııalaǵan Batys Qazaqstan oblysynyń ákimi Altaı Kólginov jergilikti bılik tarapynan óńirde ınvestorlarǵa barlyq jaǵdaı jasalatynyn aıtyp otyr.
