Eki kúnge sozylǵan konferensııa jumysyna Italııa, Reseı jáne elimizdiń ǵalymdary men sarapshylary qatysty.
Ǵylymı jıynnyń moderatory Mahambet О́temisuly atyndaǵy Batys Qazaqstan memlekettik ýnıversıtetiniń rektory, bıologııa ǵylymdarynyń kandıdaty, qaýymdastyrylǵan professor Nurlan Serǵalıev óziniń kirispe sózinde «Bolashaqqa baǵdar: rýhanı jańǵyrý» baǵdarlamasynyń qoǵam sanasyn damytýǵa qosqan úlesi týraly aıta kelip, osy baǵdarlama aıasynda bir ǵana Batys Qazaqstan oblysy aýmaǵynda 1 myńnan asa is-shara ótkenin habarlady. Bul iske qaltaly kásipkerlermen qatar qarapaıym aýyl azamattary da jappaı úles qosqan. Eki jyl ishinde atqarylǵan ıgilikti isterdi qarjyǵa shaqsaq, 3 mlrd teńgege jýyqtaıdy eken. Iаǵnı osyndaı qarjyǵa 892 joba júzege asqan.
- Jekelegen adamdardyń kómegimen Qaztalov aýdanynda akýsherlik-ambýlatorııalyq pýnkt, Shyńǵyrlaý aýdanynda kópir salyndy. Dárigerlik nysannyń arqasynda qanshama aýyl turǵynynyń turmys sapasy jaqsarsa, kópir qurylysy paıdalanýǵa berilgen soń birneshe aýyl jol beınetinen qutyldy. Tabıǵattyń kóktem men kúz sekildi jaǵdaısyz ýaqytynda úlken jermen qatynas úzilip, oqshaý qalatyn aýyldyń talaı jylǵy máselesi osylaı sheshildi. Biz elin súıgen, týǵan aýylyna járdem qolyn sozǵan kásipker azamattarǵa alǵys aıtamyz, - dedi Batys Qazaqstan oblysy ákiminiń orynbasary Ǵabıdolla Ospanqulov.
«Rýhanı jańǵyrý» baǵdarlamasy alty baǵyt, tórt kishi baǵdarlamadan turady.
PhD doktory, ıtalıandyq arheolog Jan-Lýka Bonora óz sózinde Qazaqstanda álemge syryn ashpaǵan qundy qazynalar kóp ekenin atap aıtty. Sheteldik ǵalym Mahambet О́temisuly atyndaǵy Batys Qazaqstan memlekettik ýnıversıtetinde bilim alyp jatqan bolashaq tarıhshy-arheologtarmen birlese tyń jobany júzege asyrmaq josparyn ortaǵa saldy.
- Biz kóneden kele jatqan Kaspıı teńizi jaǵalaýyn mekendegen túrli halyqtardyń turmys-tarıhyn ár dáýirge saı zertteımiz. Aldymyzda aýqymdy jumys kútip tur. Tabylǵan jádigerlerge jan-jaqty taldaý jasalady. Osy arqyly biz arheolog mamandardyń jańa býynyn qalyptastyramyz, - deıdi Jan-Lýka Bonora.
Batys Qazaqstan ınnovasııalyq-tehnologııalyq ýnıversıtetiniń Pedagogıka fakýlteti ǵylym bóliminiń jetekshisi, fılologııa ǵylymdarynyń doktory, professor Murat Sabyr Oral qalasynda zamanaýı kitaphana joqtyǵyna qynjylys bildirdi. Juban Moldaǵalıev atyndaǵy Batys Qazaqstan oblystyq ǵylymı-kópshilik kitaphana HIH ǵasyrda salynǵan kóne ǵımaratta ornalasqan. Ol jerde oqyrmannyń búgingi talabyna saı qyzmet kórsetý múmkin emes. Ǵalymnyń pikirinshe, Qazaqstannyń batys óńirinde eń nashar kitaphana Oral qalasynda.
- Biz ǵylym men bilimge jastardy shaqyramyz deımiz. Biraq keshki saǵat 6-dan keıin jabylyp qalatyn, ishinde ashanasy joq kitaphanamen ǵylymǵa jastardy qyzyqtyra almaımyz. Mysaly, Túrkııada 24 saǵat qyzmet kórsetetin kitaphanalar bar. Stýdentke arzan tamaq usynatyn, ishinde qonyp qalýǵa bolatyn, elektrondy esep arqyly kitaphanaǵa eń kóp keletin oqyrmandy anyqtap, oǵan jeke ústel usynyp, tipti arnaıy stıpendııa taǵaıyndaıtyn kitaphanalar bizde de bolýy kerek, - deıdi Murat Bókenbaıuly.
Budan keıin Mahambet О́temisuly atyndaǵy Batys Qazaqstan memlekettik ýnıversıtetiniń professory, pedagogıka ǵylymdarynyń doktory Abat Qydyrshaev, Mahambet О́temisuly atyndaǵy Batys Qazaqstan memlekettik ýnıversıtetiniń dosenti, tarıh ǵylymdarynyń kandıdaty Jańabek Jaqsyǵalıev, Batys Qazaqstan oblystyq «Zaman» óndirýshiler qaýymdastyǵy qoǵamdyq birlestiginiń tóraǵasy Aıgúl Túrkına jáne basqalary sóz sóılep, ózderin tolǵandyrǵan máselelerdi ortaǵa saldy. Konferensııa qorytyndysynda qarar qabyldandy.
Sýretti túsirgen Rafhat HALELOV
Batys Qazaqstan
