Kezdesý barysynda Aıdyn Aıymbetov Qazaqstandaǵy ǵarysh salasynyń jobalary jaıly áńgimeledi. «Qazaqstannyń ǵarysh salasyndaǵy eń úlken jańalyǵy – jeltoqsan aıynda jerdi jasandy zondtaýdyń eki spýtnıgin ushyrý. Árıne, qazaqstandyq ǵarysh ǵylymy damyp keledi. Elordada Ulttyq ǵarysh kesheni salyndy. Qazir Qazaqstannyń alty óz spýtnıgi bar. «Baıqońyr» ǵarysh aılaǵynda «Báıterek» kesheniniń qurylysy júrip jatyr. Bul uzaq merzimdi jobalardyń paıdasyn jaqyn arada kóremiz deý – ábestik. Ǵaryshty damytýǵa salynǵan qarajat araǵa biraz ýaqyt salyp, on ese nátıjesin beredi dep aıtýǵa bolady», – deıdi A.Aıymbetov.
Balalardy ǵaryshkerlerdiń nemen tamaqtanatyny, otrıadtarǵa qalaı kirýge bolatyndyǵy, ushqyshtar ushý kezinde qandaı aýyrtpalyqtardy bastan ótkeretindigine qatysty suraqtar qyzyqtyrdy. Sondaı-aq, Aıdyn Aıymbetov ǵaryshkerler tek qana tıýbık taǵamyn jeıtini týraly aqparatty joqqa shyǵardy.
«Bul ótkenniń enshisinde qaldy. Shyn máninde, ǵaryshkerlerge arnalǵan as máziri óte dámdi! Ushý kezinde biz ár eldiń ǵaryshkerlerimen dos boldyq. Bizdiń rasıonda japondyq kalmar jáne amerıkandyq shokolad boldy. Biz qymyz, qurt jáne basqa da ónimderimizdi Qazaqstannan sálemdeme retinde usyndyq», – dedi Aıdyn Aıymbetov.
Kezdesýge qatysqan názik qyz-kelinshekter: «Ǵaryshqa áıelderdi nelikten sırek jiberedi?» dep surady. Aıymbetovtyń aıtýynsha, bul kóbinese densaýlyq pen fızıkalyq júktemelerge baılanysty.
«Alaıda, áıelder burynnan ǵaryshqa sapar shegip keledi. Áıelder ushý barysynda kúrdeli ǵylymı eksperımentterge qatysyp, ekıpajdyń naǵyz áshekeıi bolyp tabylady», – deıdi Aıdyn Aıymbetov.
