Kókshetaý áýejaıy halyqaralyq áýe reısterin qaıta jandandyrmaq. Mamyr aıynyń sońyna qaraı Máskeý-Kókshetaý-Máskeý baǵytynda áýe reısi qatynaıtyn bolady. Reısti Irkýtskiniń «IrAero» áýekompanııasy 98 jolaýshyǵa arnalǵan «Sukhoi Superjet 100» ushaǵy arqyly júzege asyrady dep kútileýde.
Mundaı qadam Aqmola óńiriniń týrıstik áleýetin arttyra túsýge ıgi yqpalyn tıgizedi. Ázirge reıs aptasyna bir ret, keıin eki ret Máskeýdiń Jýkovskıı áýejaıy arqyly uıymdastyrylady. Bul áreket kórshi memleketpen saýda-ekonomıkalyq qatynastardy da jaqsarta túspek. Aldaǵy jyly Kókshetaýda Qazaqstan-Reseı óńiraralyq yntymaqtastyq forýmyn ótkizý josparlanyp otyr. Bul sol mańyzdy is-sharalarǵa daıyndyqtyń bir parasy.
Jaz aılarynda tabıǵaty tamyljyǵan Býrabaı baýraıyna reseılikterdiń qyzyǵýshylyǵy arta túsedi. Mine, osyndaı kezde qatynasta kidiristiń bolmaǵany jaqsy.
Aqmola oblysy
