Kózge ystyq beıne
Senbi, 21 sáýir 2012 7:46
Sýretshi Oral Tańsyqbaevqa Almatyda eskertkish ornatyldy
«Eldiń mádenıetin, salt-dástúrin, ádet-ǵurpyn jan-jaqty zerttep bilgende ǵana ǵajaıyp ulttyq óner týyndaýy múmkin», degen ataqty qylqalam sheberi Oral Tańsyqbaevtyń tastan qashalǵan eskertkishi ońtústik astanadan óz ornyn tapty.
Senbi, 21 sáýir 2012 7:46
Sýretshi Oral Tańsyqbaevqa Almatyda eskertkish ornatyldy
«Eldiń mádenıetin, salt-dástúrin, ádet-ǵurpyn jan-jaqty zerttep bilgende ǵana ǵajaıyp ulttyq óner týyndaýy múmkin», degen ataqty qylqalam sheberi Oral Tańsyqbaevtyń tastan qashalǵan eskertkishi ońtústik astanadan óz ornyn tapty.
KSRO halyq sýretshisi, akademık Oral Tańsyqbaevqa ornatylǵan osy bir eskertkish kózimizge erekshe jylyushyrady. Talantty sýretshiniń músini óziniń tastan qashalǵanyn umyttyryp, kúlimsirep tur. Daryn retinde de, adam retinde de taǵdyrdyń talaı teperishinen ótip, osy kúnge jetkenine qýana qaraıtyn sııaqty. Eskertkishtiń taǵy bir ereksheligi, ol Oral Tańsyqbaev atyndaǵy Almaty sándik-qoldanbaly óner kolledjiniń eń qabiletti ustazdarynyń qolynan shyqqan.
Osy arada bul kolledj elimizdiń talaı maıtalman sýretshileri men músinshilerin beıneleý óneriniń qyr-syryna baýlyǵan, kezindegi N.Gogol atyndaǵy Almaty kórkemsýret ýchılıshesi ekendigin aıta ketý artyq bolmas. Demek, osydan 20 jyl buryn Oral Tańsyqbaev atyn ıemdengen kolledjdiń tarıhy 1937 jyldan bastaý alady. Al eskertkishtiń qoıylýy da osy 75 jyldyq mereıtoıǵa oraılastyrylyp otyr.
Sáýirdiń kún shýaǵy sebelegen sátti kúnine dóp kelgen aıtýly sharaǵa árisi Tashkentten, berisi Bishkekten de arnaıy qonaqtar keldi. Elimizdiń betke ustar keskindemeshileri, aıtýly sýretshileri men óner ókilderi de osynda.
Alǵashqy sózdi O.Tańsyqbaev atyndaǵy Almaty sándik-qoldanbaly óner kolledjiniń dırektory, professor Seıitqalı Shalabaev alyp, osynaý saýapty iske muryndyq bolǵandar jaıly baıandady.
Qazaq KSR-nyń halyq sýretshisi Úke Ájıev, T.Júrgenov atyndaǵy Qazaq Ulttyq óner akademııasynyń rektory Arystanbek Muhamedıuly, Sýretshiler odaǵynyń tóraǵasy Baıtursyn О́mirbekov syndy óner salasynyń kórnekti ókilderi Oral Tańsyqbaevtyń shyǵarmashylyq tulǵasy týraly sóz sabaqtady. Keleshekte qoldanbaly ónerdiń kósegesin kógertemiz dep bilim alyp jatqan jastarǵa talaı taǵylymdy áńgimeler men estelikter aıtyldy.
Osy sharaǵa arnaıy kelgen О́zbekstan О́ner akademııasynyń professory Nıgora Ahmedqyzy men Qyrǵyzstandaǵy óner kolledjiniń ustazy Tabyldy Baıbosynov Oral Tańsyqbaevtyń kórshi elderde de talanty tanylǵan, shoqtyǵy bıik sýretker ekendigin sóz etti.
Aınash ESALI,
Almaty.
