Aımaqtar • 21 Sáýir, 2019

Edil men Jaıyq sýy aralasty

413 ret kórsetildi

Batys Qazaqstan oblysynda tórt aýdandy sýmen qamtyp, sharýa qojalyqtaryna mal sýarýǵa jáne egindi jerlerdi sýlandyrýǵa múmkindik beretin Kırov-Shejin arnasy iske qosyldy. Uzyndyǵy 180 shaqyrymǵa sozylǵan arnanyń qurylysyna jergilikti bıýdjetten 2 401,726 mln. teńge jumsalǵan.

Qaztalov aýdanynyń Aqpáter aýyly mańynda sý qaqpasyn ashý rásimine qatysqan Batys Qazaqstan oblysynyń ákimi Altaı Kólginov bul kúndi tarıhı oqıǵa dep baǵalady.

- Qaraózendegi Edildiń sýyna Kırov-Shejin arnasy arqyly Jaıyq sýy qosylyp otyr. Kanaldyń iske qosylýy aýyl sharýashylyǵy salasymen aınalysatyn azamattar men aýdan turǵyndaryna úlken qoldaý. Elbasymyzdyń salıqaly saıasatynyń arqasynda osy kúnge qol jetkizdik. Halyqtyń turmys sapasyn arttyrý máselesi memleket basshysy Q.Toqaevtyń jeke baqylaýynda. Biz óńirde memlekettik baǵdarlamalar budan ári nátıjeli oryndalatynyna sendiremiz. Endigi maqsat – osy sýdyń ıgiligin kórip, mal sharýashylyǵyn damytý kerek. Kanal boıynda ornalasqan sharýashylyqtar júgeri, kópjyldyq shóp egý sııaqty jumystardy júzege asyrýy qajet, - dedi óńir basshysy Qaztalov aýdany halqymen júzdesý kezinde.

Bul joba Reseı Federasııasynan keletin sýǵa táýeldilikti azaıtýdy maqsat etken. Osy arqyly arna boıyndaǵy 130 myń gektar jer sýlandyrylyp, 22 toǵan sýǵa tolady. Olardyń árqaısysy 10 myń sharshy metr aýmaqty qamtymaq. Kanal sharýa qojalyqtaryna maldaryn sýarýǵa jáne egindi jerlerdi sýlandyrýǵa múmkindik týady.

Kırov-Shejin kanalynyń qurylys jumystaryna jaýapty «Qazsýshar» mekemesi Batys Qazaqstan oblystyq fılıalynyń dırektory Nurbolat Jumaǵalıevtiń aıtýynsha, Jaıyq sýy qazirgi kúnde sekýndyna 5 tekshemetr jyldamdyqpen Qaraózenge quıylyp jatyr.

Altaı Kólginov osy saparynda Aqpáter aýylyndaǵy «Rýhanı jańǵyrý» baǵdarlamasynyń «Týǵan jer» jobasy aıasynda salynǵan feldsherlik-akýsherlik pýnktiniń jumysymen tanysty. Bul medısınalyq pýnkt ǵımaratyn jeke kásipker Samat Hasanov óziniń 16 mln. teńge qarajatyna salyp, aýyl halqyna tartý etken bolatyn.

Sońǵy jańalyqtar

Petr Iаn úzdikter qataryna endi

Jekpe-jek • Búgin, 16:05

Erteń Qazaqstan quramasy Beıjińge attanady

Qysqy sport • Búgin, 11:15

Uqsas jańalyqtar