Joldama qaı boksshyǵa buıyrady?
Beısenbi, 5 sáýir 2012 7:36
Olımpıadaǵa 113 kún qaldy
Búgin Astana tórinde Azııanyń 29 eliniń boksshylary qatysatyn Elbasy Nursultan Nazarbaevtyń júldesi úshin halyqaralyq týrnır bastalady. Osy dúbirli dodada Azııa aımaǵy boıynsha 10 salmaqta Jazǵy Olımpııa oıyndarynyń 29 joldamasy sarapqa salynady.
Olımpıadaǵa 113 kún qaldy
Búgin Astana tórinde Azııanyń 29 eliniń boksshylary qatysatyn Elbasy Nursultan Nazarbaevtyń júldesi úshin halyqaralyq týrnır bastalady. Osy dúbirli dodada Azııa aımaǵy boıynsha 10 salmaqta Jazǵy Olımpııa oıyndarynyń 29 joldamasy sarapqa salynady.
Bul básekede bilikti bapker Myrzaǵalı Aıtjanov jattyqtyratyn Qazaqstan ulttyq quramasy 4 salmaq dárejesi boıynsha kúsh synasady. Onda eń jeńil, ıaǵnı 49 kıloda Birjan Jaqyp, 52 kıloda Ilııas Súleımenov, 64 kılo salmaqta Danııar Eleýsinov pen 91 kıloda Vasılıı Levıt qolǵap túıistiredi. Osy boksshylar Qazaqstan quramasynyń byltyr Bakýde ótken álem chempıonatynda jeńip alǵan 5 lısenzııasynan basqa taǵy 4 joldama úshin talasatyn bolady.
Al Bakýde bolǵan álem chempıonatynda bizdiń elimizden qola júldeger atanǵan Ǵanı Jaılaýov (60 kg.), kúmis júldegerler Serik Sápıev (69 kg.) pen Ádilbek Nııazymbetov (81 kg.) jáne qola júldeger bolǵan asa aýyr salmaqtaǵy Ivan Dychko Olımpıada joldamasyn ıelengen bolatyn. Sonymen birge, osy synda 75 kılodaǵy Danabek Sýjanov ta Londonǵa joldamany jeńip aldy. Ol óz salmaǵynda shırek fınalǵa shyǵyp, lısenzııaǵa ıe boldy. Osylardyń ishinde Sýjanov pen Nııazymbetovtiń alǵash ret álem chempıonatyna qatysyp, joldamany jeńip alǵanyn aıta ketken jón.
49 kılodaǵy Birjan Jaqyp – ulttyq qurama bapkeriniń tól shákirti. Ol da Bakýde ótken álem chempıonatyna qatysyp, Olımpıada joldamasy úshin kúsh synasqan bolatyn. Alaıda, sol joly myqty qarsylastarǵa kezikken Birjannyń joly bolmady. Ol – osyǵan deıin de biraz álem chempıonattary men halyqaralyq týrnırlerdiń, tipti Beıjiń Olımpıadasynyń da jeıdesin tozdyrǵan boksshy. Onyń eń basty jetistigi – 2005 jylǵy álem chempıonatynyń qola júldegeri atanǵany. Sodan keıin ol birneshe halyqaralyq týrnırlerdiń jeńimpazy atandy. Bul jerde oǵan Olımpıada chempıony, úsh dúrkin álem chempıony qytaı Zoý Shımınniń kúni búginge deıin basty qarsylas bolyp kele jatqanyn aıtý kerek. Zoý Birjan úshin alynbaıtyn qamal sııaqty. Byltyr Bakýde ótken álem chempıonatynda da qytaı boksshysy úshinshi márte chempıon atanǵanda, bizdiń Birjan barmaǵyn tistep qalǵan. Sol joly ol Olımpıada joldamasyn ala almaı, jarysty erte aıaqtady. Osy jeńilisinen keıin Birjannyń London Olımpıadasyna joldama beretin jarystarǵa qatysýy belgisiz bolǵan. Biraq, onyń baǵy bar eken. Onyń salmaǵyndaǵy lısenzııalyq jarys osy jyldyń basynda Astanada ótetin bolyp sheshildi. Buǵan deıin Halyqaralyq olımpıadalyq komıtet 49 kıloda Olımpıada joldamasy sarapqa salynbaıdy, óıtkeni, Bakýde ótken álem chempıonatynda bul salmaqtaǵy 6 boksshy Olımpıada lısenzııasyn alyp qoıǵan dep málimdeme jasaǵanyn bilemiz. Biraq AIBA basshylary ózderiniń sheshimderine shuǵyl ózgeris engizip, Azııa aımaǵy boıynsha 75 kılo salmaqtaǵy bir lısenzııany Eýropaǵa berip, ózderine Eýropadan 49 kılodaǵy bir joldamany qosyp aldy. Bizdiń boksshy úshin Olımpıada joldamasyn jeńip alýǵa budan asqan múmkindik bar ma? Endi bizdiń boksshyǵa osy múmkindikti tıimdi paıdalanýǵa umtylý kerek.
Kelesi 52 salmaqta bizdiń quramadaǵy tájirıbeli boksshymyz Oljas Sáttibaevtyń týrnırge qatysýǵa basty úmitkerdiń biri bolǵany belgili. Alaıda, sońǵy sátte onyń ornyna Ilııas Súleımenov shyǵatyn bolyp sheshildi. Osy týrnırde Súleımenovke myqty qarsylas bolatyn boksshylar kóp. Onyń eń basty qarsylastary retinde Qytaı, Mońǵolııa sııaqty elderdiń ókilderi sanalady. Degenmen, Ilııastyń London Olımpıadasy sarapqa salynatyn tórt joldamanyń bireýin jeńip alýǵa múmkindigi bar. Ol úshin jartylaı fınalǵa shyqsa jetedi.
Budan keıingi 64 kıloda sary qurlyqtyń lısenzııasyn Danııar Eleýsinov jeńip alýǵa umtylatyn bolady. Bul boksshy da Bakýdegi álem chempıonatynda orta joldan súrinip, joldamaǵa qol jetkize almaǵan bolatyn. Sondyqtan D.Eleýsinovke Astanadaǵy týrnırde sońǵy múmkindik.
Osy týrnırde 91 kılo salmaqtaǵy Vasılıı Levıtke de Olımpıada lısenzııasyn ıelenýge múmkindik berilip otyr. Onyń Astana týrnırine qatysatyny sońǵy sátte sheshildi. Bastapqyda Levıttiń jaraqat alýyna baılanysty 91 kıloda Danııar Ústembaevtyń shyǵatyny týraly áńgime bolǵan. Biraq, Levıt jaraqatynan aıyǵyp, ózine tez keldi. Sóıtip, bapkerler oǵan taǵy bir múmkindik berýge sheshim qabyldady. Bul boksshymyz da Bakýdegi álemdik básekede joldamadan qaǵylǵan bolatyn. Endi sol kezde ketken esesin Astana tórinde qaıtarady dep senemiz. Levıttiń salmaǵynda Azııa aımaǵy boıynsha 2 lısenzııa bólingen. Al Olımpııa oıyndarynda bul salmaqta 16 boksshy kúsh synasady.
Astanadaǵy týrnırden keıin Olımpıada joldamasy úshin taǵy birneshe jarys ótetin bolady. Jyl basynan bergi alǵashqy jarys 20-26 naýryz kúnderi Avstralııanyń Kanberra qalasynda ótti. Onda Muhıt aımaǵy boıynsha lısenzııalar sarapqa salyndy. Endi aldaǵy jarystar Eýropa, Amerıka jáne Afrıka qurlyqtarynda ótedi dep josparlanýda. Atap aıtqanda, 13-22 sáýir aralyǵynda Túrkııanyń Trabzon qalasynda Eýropa elderi Olımpıadanyń qalǵan 26 joldamasyn sarapqa salsa, 27 sáýir men 6 mamyr kúnderi Afrıka elderi Marokkonyń Kasablanka qalasynda qurlyqtyq lısenzııalar úshin baq synasady. Al Amerıka qurlyǵyndaǵy jarystar 4-13 mamyr aralyǵynda Brazılııanyń Rıo-de Janeıro qalasynda ótedi. Osy irikteý týrnırleri bitken soń, AIBA Halyqaralyq olımpıada komıtetimen birigip, taǵy segiz joldamany bóledi. Onyń bireýi Azııa qurlyǵyna beriledi dep kútilýde.
Astanada ótetin lısenzııalyq týrnırde sarapqa salynatyn joldamalardyń sany
Salmaq dárejesi Sany
49 kılo 1
52 kılo 4
56 kılo 3
60 kılo 1
64 kılo 4
69 kılo 3
75 kılo 4
81 kılo 3
91 kılo 1
+91 kılo 1
Barlyǵy 25
Qurlyq boıynsha qalǵan joldamalardyń sany
Salmaq Afrıka Amerıka Azııa Eýropa Barlyǵy
49 kılo 6 3 1 4 14
52 kılo 6 2 4 3 15
56 kılo 5 4 3 4 16
60 kılo 6 4 1 4 15
64 kılo 6 5 4 1 16
69 kılo 6 5 3 2 16
75 kılo 5 5 4 2 16
81 kılo 4 5 3 3 14
91 kılo 2 3 1 1 7
+91 kılo 2 3 1 2 8
Barlyǵy 48 38 25 26 137
Dastan KENJALIN.
