Medısına • 24 Sáýir, 2019

Qazaqstan-Koreıa onkologtary bas qosty

996 ret

kórsetildi

3 mın

oqý úshin

Nur-Sultan qalasyndaǵy Nazarbaev Ýnıversıtetiniń medısına mektebiniń ǵımaratynda Koreıa Respýblıkasy Prezıdentiniń Qazaqstanǵa sapary aıasynda Densaýlyq saqtaý jáne áleýmettik qamsyzdandyrý mınıstri Pak Nyn Hýdyń qatysýymen «Qazaqstan-Koreıa» onkologııalyq sımpozıýmy ótti.

Maıgúl SULTAN

«UMC» korporatıvtik qory men Koreıanyń densaýlyq saqtaý ındýstrııasyn damytý ınstıtýtynyń (KHIDI) yntymaqtastyǵy sheńberinde ótken basqosýda eki el onkologtary Qazaqstan men Koreıanyń onkologııalyq aýrýlarmen kúresiniń jalpy saıasaty, protondy terapııanyń qazirgi zamanǵy ádis-tásilderi, sút bezi obyryn erte kezeńde anyqtaý, laparoskopııalyq hırýrgııa sııaqty t.b. saladaǵy ózge de ózekti máselelerin talqylady.

Sımpozıým jumysyn ashqan «UMC» korporatıvtik qorynyń basqarma tóraǵasy J.Jumadilov mundaı is-sharalar ózara tájirıbe almasýǵa, qaterli isik aýrýlarymen kúreste kúsh biriktirýge múmkindik beretinin atap kórsetti.

Koreıanyń Ulttyq onkologııalyq ortalyǵynyń prezıdenti Lı Yn Sýk qatysýshylardyń nazaryna ortalyq qyzmeti men onyń damý kezeńderi, kórsetiletin qyzmet túrleri jóninde baıandama usynyp, sút bezi obyryn erte anyqtaý, laparoskopııalyq hırýrgııa ádisteri týraly tájirıbelerimen bólisti. «Koreıa Respýblıkasyndaǵy Onkologııalyq qyzmetti uıymdastyrý jospary 1995 jyly alǵash ret ázirlenip, qoldanysqa engizildi. 2001 jyly osy josparǵa sáıkes Ulttyq onkologııa ortalyǵy ashyldy. Alǵashynda onkologııaǵa shaldyqqan pasıentterdiń 5 jyldyq ómir súrý qabileti 40% deńgeıinde edi. 2016 jyldyń qorytyndysy boıynsha bul kórsetkish 71%-ǵa deıin artty. Buǵan onkopasıentterdi joǵary dáldikpen der kezinde tirkeý de sebep bolyp otyr. Bul barsha halyqtyń 99%-yn qamtıdy. Osyǵan baılanysty respýblıkamyzda negizgi málimetter bazasy quryldy, bul ǵylymı-zertteý jumysyn júrgizý jáne daralanǵan ári nysalanǵan terapııaǵa daıyndaý úshin de úlken septigin tıgizdi. Qazaqstanda onkologııalyq kómek kórsetý qyzmeti uıymdastyrylýda, sondaı-aq protondyq terapııany uıymdastyrý máselesin qarastyrýda. Protondyq terapııa baǵytyn biz 2001 jyly ázirleı bastadyq, 2007 jyly Protondyq terapııa ortalyǵy ashyldy», dedi ol.

Sondaı-aq basqosýda Koreıanyń onkologııalyq ortalyǵynyń qurylymdyq bólimsheleriniń jetekshileri onkologııalyq aýrýlardy baqylaýdy kúsheıtý, túrli qaterli isik aýrýlaryn emdeýde protondyq terapııany paıdalaný boıynsha tájirıbelerimen bólisti.

«UMC» korporatıvtik qorynyń Onkologııa jáne transplantologııa ulttyq ǵylymı ortalyǵynyń Onkogematologııa jáne kemik maıy transplantasııasy bóliminiń jetekshisi V.Kemaıkın Qazaqstanda gematologııalyq qyzmetti qalyptastyrýdyń negizgi kezeńderi men damytý boıynsha júrgizilgen jumystardyń nátıjelerin baıandady.

Aıta keteıik, Qazaqstanda byltyr qaterli isik aýrýlaryna shaldyqqan 35 myńnan astam adam anyqtalǵan, al jalpy onkologııalyq naýqastar sany 170 myńnan asady.