Úkimet • 26 Sáýir, 2019

Úkimettik jumys toby Almatynyń áleýmettik mekemeleriniń jumysyn tekserdi

721 ret kórsetildi

Premer-Mınıstrdiń orynbasary G. Ábdiqalyqovanyń basshylyǵymen Elbasynyń «Áleýmettik qamqorlyq» jańa áleýmettik sharalarynyń negizgi baǵyttaryn túsindirý jónindegi Úkimettik delegasııa Almaty qalasyna bardy dep habarlaıdy primeminister.kz

Delegasııa aldymen №2 qalalyq balalar klınıkalyq aýrýhanasynyń janyndaǵy konsýltasııalyq-dıagnostıkalyq pedıatrııa ortalyǵyna bardy. Onda delegasııaǵa qabyldaý bólimi men hırýrgııa kesheniniń jumysy tanystyryldy. Ony bıznestiń áleýmettik jaýapkershiligi aıasynda Ásel Tasmaǵambetova basshylyq etetin «Sábı» qaıyrymdylyq qory qurǵan. Jobanyń jalpy quny — 2,5 mlrd teńge.

Qazaq onkologııa jáne radıologııa ǵylymı-zertteý ınstıtýtynda G. Ábdiqalyqova molekýlalyq-genetıkalyq zertteýler ortalyǵynyń jumysymen tanysty. Medısınalyq mekeme zamanaýı jabdyqpen: kompıýterlik jáne magnıtti-rezonanstyq tomograftarmen, saraptamalyq klastaǵy radıografıkalyq rentgen jáne ýltradybystyq júıelermen, EKG-apparattarmen jabdyqtalǵan. Barlyq prosester sıfrlyq formatta júzege asyrylady.

Sodan keıin Premer-Mınıstrdiń orynbasary «MEIIRIM» múmkindigi shekteýli balalar men jasóspirimderge arnalǵan ońaltý ortalyǵyna bardy. Ortalyqta 3-15 jas aralyǵyndaǵy múmkindigi shekteýli balalar men jasóspirimderdiń jan-jaqty damýy, áleýmettenýi men oqýy úshin barlyq qajetti jaǵdaılar jasalǵan. Ortalyq ashylǵan kezden bastap (2018 jyldyń qarashasy) 200-ge jýyq bala ońaltý men áleýmettendirý sharalarynan ótti.  

Kelesi is-shara 2018 jyldyń maýsym aıynan beri jumys istep kele jatqan Belsendi uzaq ómir súrý ortalyǵynda ótti. Onda medısınalyq kabınet, ıoga zaly, kompıýterlik saýattylyqqa oqytý, qazaq jáne aǵylshyn tilderin úıretý kabınetteri, sondaı-aq eńbek terapııasyna arnalǵan kabınet bar. Osy ýaqyt aralyǵynda 900-ge jýyq zeınetker basseınder men fıtneske tegin baryp, 300-den astam qart adam «Suńqar» tálimbaǵyna, bıik taýdaǵy «Medeý» sport keshenine, Ortalyq memlekettik mýzeıge jáne t.b. tegin ekskýrsııa jasady.

Sondaı-aq, Premer-Mınıstrdiń orynbasary men Eńbek jáne halyqty áleýmettik qorǵaý mınıstri Halyqty jumyspen qamtý ortalyǵynyń qyzmetine tekserý júrgizdi. Jyl basynan beri 3,4 myń adam jumysqa ornalastyryldy, onyń 254-i az qamtylǵan, kóp balaly otbasylardan shyqqandar. 717 adam áleýmettik jumys oryndarymen qamtamasyz etildi. 2,5 myń adam qoǵamdyq jumystarǵa tartyldy.

Sonymen birge, G. Ábdiqalyqova azamattardy qabyldady. Atap aıtqanda, 4 balany tárbıelep otyrǵan kóp balaly ana Janna Toqtasynova jubaıyn jumysqa ornalastyrý jóninde ótinish bildirip kelgen bolatyn. Ataýly áleýmettik kómekti alý úshin jubaıy jumyspen qamtylýy tıis. Másele sheshildi – Vıse-Premer qala basshylyǵyna naqty tapsyrma berdi.

Birinshi jumys kúniniń sońynda Premer-Mınıstriniń orynbasary «SmArt Point» kovorkıng ortalyǵynyń alańynda jastarmen kezdesti. Kezdesýde eńbek jáne halyqty áleýmettik qorǵaý, aqparat jáne qoǵamdyq damý, bilim jáne ǵylym, densaýlyq saqtaý mınıstrleri, Almaty qalasynyń ákimi, qurylys jáne turǵyn úı-kommýnaldyq sharýashylyq isteri, sport jáne dene shynyqtyrý komıtetteriniń tóraǵalary sóz sóıledi.

Sharany asha otyryp, Gúlshara Ábdiqalyqova Qazaqstan sabaqtastyq, ádildik jáne progress prınsıpterine súıene otyryp, qaryshtap damýyn jalǵastyryp kele jatqanyn atap ótti. Osy prosesterde jastar sheshýshi róldiń birin atqarýy tıis.

Búginde qalamyzda 684 myńnan astam jas azamat bar, olardyń 218 myńnan astamy joǵary oqý oryndarynyń stýdentteri. «Jastardy damytý men qoldaýdyń 2017-2020 jyldarǵa arnalǵan Jol kartasy» iske asyrylyp jatyr. 20 myńnan astam adam jumysqa ornalastyryldy. «Almaty jastary» jeńildikti turǵyn úı baǵdarlamasy boıynsha jas otbasylar úshin 238 turǵyn úı zaemy berildi. Bilim berý granttarynyń sany 1,5 ese kóbeıip, 28 myńdy qurady.

Kezdesýde «Inno Track» JShS-nyń bas dırektory Darhan Qyzaıbaevtyń sózine erekshe nazar aýdaryldy. Onyń kásiporny «Vollert» nemis tehnologııasy boıynsha temir-betondy shpaldar shyǵarady. Zaýyttyń jyldyq qýattylyǵy – 500 myń shpal, 100 adam jumys isteıdi. Ol talapty jastar úshin «múmkindikter esigin» ashatyn zamanaýı ındýstrıaldy saıasat úshin memleketke alǵysyn bildirdi.

Sondaı-aq «Youth Art» jas sýretshiler uıymynyń basshysy Krıstına Bekmýrzaevanyń quttyqtaý sózi qyzyǵýshylyqpen tyńdaldy. Olar «Adamdarǵa arnalǵan qala» tujyrymdamasyn iske asyrýǵa belsene qatysyp, 10 joǵary deńgeıdegi shaǵyn sáýlettik pishindi ornatty.

Kezdesý qorytyndysy boıynsha Premer-Mınıstrdiń orynbasary G. Ábdiqalyqova memlekettik organdardyń basshylaryna birqatar naqty tapsyrmalar berdi.

Almaty qalasyndaǵy jumys sapary jalǵasady.

Sońǵy jańalyqtar

Shymkentte taǵy bir aýdan qurylady

Qoǵam • Búgin, 16:58

Almatyda qant qymbattap barady

Qoǵam • Búgin, 16:45

Dollar baǵamy ósti

Qarjy • Búgin, 16:12

Uqsas jańalyqtar