Qazaqstan Respýblıkasynyń Prezıdenttigine kandıdattyń memlekettik tildi erkin meńgergendigin anyqtaıtyn lıngvıstıkalyq komıssııa músheleri tolyq quramda qatysty. Lıngvıstıkalyq emtıhan barlyq úsh kezeń boıynsha ótti: taqyryp boıynsha jazbasha tapsyrma jazý, mátin oqý jáne lıngvıstıkalyq komıssııa bergen taqyrypqa kópshilik aldynda keminde on bes mınýt sóz sóıleý. Emtıhan tapsyrylǵannan keıin lıngvıstıkalyq komıssııa talqylaý ótkizip, qorytyndylady. Otyrysqa Ortalyq saılaý komıssııasynyń múshesi Lázzát Jańylysqyzy Súleımen qatysty. Komıssııa jumysy ashyq jáne jarııaly túrde júzege asyryldy. Bul týraly Ortalyq saılaý komıssııasynyń múshesi, fılologııa ǵylymdarynyń doktory, professor, Qazaqstan Respýblıkasy Ulttyq ǵylym akademııasynyń korrespondent-múshesi, A.Baıtursynuly atyndaǵy Til bilimi ınstıtýtynyń dırektory Erden Qajybek aıtyp berdi. Ol: - Qazaqstan Respýblıkasynyń Prezıdenttigine kandıdat Tóleýtaı Sataıuly Raqymbekov kelip, memlkettik tildi erkin meńgergendigin anyqtaý úshin emtıhan tapsyrdy. Ata Zańymyzdyń 41-babynyń 2 tarmaǵynda kórsetilgendeı, kandıdat memlekettik tildi erkin meńgergen be, joq pa degen sheshim shyǵarýymyz kerek boldy. Ádettegideı jazylym, oqylym boıynsha kandıdat úsh tapsyrmany oryndady. Birinshi jazbasha jumysy "Bizdiń kúshimiz – birlikte" degen taqyrypqa arnalǵan. Bul suraqqa kandıdat bir saǵattaı otyryp, asyqpaı, baıyppen daınydaldy. Odan keıin ekinshi oqylym boıynsha ózi tańdap alǵan Muhtar Áýezovtiń "Abaı joly" shyǵarmasy boldy. Onyń bul tańdaýy komıssııa múshelerin qýantty, óıtkeni bul óte úlken, mańyzdy taqyryp edi. Úshinshi tapsyrmasy ózi alǵan bıletine sáıkes "Elorda – táýelsizdik tuǵyry" atty taqyryp boldy. Osy úsh tapsyrmany oryndaý barysynda Qazaqstan Respýblıkasynyń Prezıdenttigine kandıdat memlekettik tildi óte joǵary deńgeıde meńgergendigin anyq kórsetti. Árıne jazylymda eki, úsh emeleden tehnıkalyq qateler boldy. Biraq olardy asa mańyzdy emes dep esepteımiz. Negizinen stıl men sóz saptaý turǵysynan jáne saýattylyq jaǵynan Tóleýtaı Sataıuly Raqymbekov bir aýyzdan memlkettik tildi erkin meńgergen degen baǵa aldy, dep sózin qorytyndylady.
